ٹی 20 ورلڈکپ میں پاکستان اور بھارت کے درمیان بڑے مقابلے سے قبل دونوں ٹیموں کے کپتانوں کے درمیان روایتی ہینڈ شیک نہ ہونے پر کرکٹ حلقوں میں بحث چھڑ گئی ہے۔ شائقین اور ماہرین کی جانب سے اسے کھیل کی روایت کے منافی قرار دیا جا رہا ہے۔
میچ کے آغاز سے قبل بھی دونوں ٹیموں کے درمیان رسمی مصافحہ دیکھنے میں نہیں آیا، جس کے بعد سوشل میڈیا پر مختلف آراء سامنے آ رہی ہیں۔ ٹاس کے موقع پر دونوں کپتانوں کی ملاقات مختصر رہی اور کھلاڑی اپنی اپنی تیاریوں میں مصروف دکھائی دیے۔
بھارتی کپتان کا بیان
میچ سے ایک روز قبل پریس کانفرنس میں ہینڈ شیک سے متعلق سوال پر بھارتی کپتان نے کہا تھا کہ “اچھی کرکٹ کھیلنے آئے ہیں، ہینڈ شیک کا سسپنس کل ختم ہو جائے گا، 24 گھنٹے انتظار کریں۔”
سابق بھارتی کرکٹر کی تنقید
بھارت کے سابق ٹیسٹ کرکٹر اور کمنٹیٹر سنجے منجریکر نے بھی ہینڈ شیک نہ کرنے کے عمل کو نامناسب قرار دیا۔ انہوں نے سوشل میڈیا پر لکھا کہ اس طرح کا رویہ کھیل کے شایانِ شان نہیں اور اسے ختم ہونا چاہیے۔
ایشیا کپ کی مثال
یاد رہے کہ ایشیا کپ کے دوران بھی دونوں ٹیموں کے درمیان کھیلے گئے میچز میں اسی نوعیت کی صورتحال دیکھنے میں آئی تھی، جس پر اس وقت بھی تنقید کی گئی تھی۔
کرکٹ ماہرین کی رائے
ماہرین کے مطابق پاکستان اور بھارت کے درمیان مقابلے صرف کھیل تک محدود رہنے چاہئیں اور روایتی اسپورٹس مین شپ کو برقرار رکھنا عالمی کرکٹ کے لیے ضروری ہے۔
اس تمام صورتحال کے باوجود شائقین کی توجہ اب میدان میں جاری مقابلے پر مرکوز ہے جہاں پاکستانی بولنگ اٹیک سے ابتدائی اوورز میں حریف ٹیم پر دباؤ ڈالنے کی توقع کی جا رہی ہے۔
About The Author
