ترکیے کے حکام نے یورپی ممالک میں غیر قانونی طور پر داخل ہونے کی کوشش کرنے والے 18 افغان مہاجرین کو صوبہ ادرنہ سے گرفتار کرلیا۔ ترک خبر رساں ایجنسی کے مطابق گرفتار افراد میں خواتین اور بچے بھی شامل ہیں، جنہیں ملک بدری کی کارروائی کے لیے متعلقہ حراستی مراکز منتقل کر دیا گیا ہے۔
ترک سرحدی فورسز کا کہنا ہے کہ یہ کارروائی ایک خصوصی آپریشن کے دوران کی گئی، جس کا مقصد زمینی راستوں کے ذریعے یورپ جانے کی کوشش کرنے والے تارکینِ وطن کو روکنا تھا۔ ادرنہ کو یورپ پہنچنے کے خواہشمند مہاجرین کے لیے ایک اہم راہداری تصور کیا جاتا ہے، جہاں ہر سال ہزاروں افراد سرحد عبور کرنے کی کوشش کرتے ہیں۔
ترک ڈائریکٹوریٹ جنرل آف مائیگریشن مینجمنٹ کے اعداد و شمار کے مطابق گزشتہ سال ملک بھر میں ایک لاکھ 52 ہزار سے زائد غیر قانونی تارکینِ وطن کو حراست میں لیا گیا، جن میں 42 ہزار سے زیادہ افغان شہری شامل تھے۔
ماہرین کے مطابق افغانستان میں معاشی بدحالی، بے روزگاری اور سکیورٹی خدشات کے باعث بڑی تعداد میں شہری یورپ کا رخ کرنے کی کوشش کر رہے ہیں، جبکہ ترکیے نے حالیہ برسوں میں سرحدی نگرانی سخت کر کے انسانی اسمگلنگ کے خلاف کارروائیاں تیز کر دی ہیں۔
About The Author
