واشنگٹن – امریکی میڈیا نے دعویٰ کیا ہے کہ صدر ڈونلڈ ٹرمپ کی انتظامیہ ایران کے خلاف ممکنہ بڑے فوجی آپریشن کے قریب پہنچ گئی ہے، جبکہ خطے میں امریکی فوجی سرگرمیوں میں نمایاں اضافہ دیکھا جا رہا ہے۔
میڈیا رپورٹس کے مطابق امریکا ایران کے جوہری اور بیلسٹک میزائل پروگرام کو نشانہ بنانے کے لیے مختلف عسکری آپشنز پر غور کر رہا ہے۔ واشنگٹن کی جانب سے مذاکرات میں سخت ریڈ لائنز مقرر کی گئی ہیں اور سفارتی عمل کے ساتھ ساتھ فوجی تیاری بھی جاری ہے۔
رپورٹ میں کہا گیا ہے کہ امریکا اور ایران کے درمیان جاری مذاکرات میں تاحال بڑا خلا موجود ہے اور فوری طور پر کسی معاہدے کے امکانات کم دکھائی دیتے ہیں۔ ذرائع کے مطابق مشرقِ وسطیٰ میں امریکی بحری بیڑوں اور لڑاکا طیاروں کی تعیناتی میں اضافہ کیا گیا ہے، جسے ممکنہ دباؤ کی حکمتِ عملی قرار دیا جا رہا ہے۔
امریکی میڈیا کا کہنا ہے کہ واشنگٹن بیک وقت سفارتی اور عسکری دونوں راستے کھلے رکھے ہوئے ہے، تاہم اگر مذاکرات ناکام ہوتے ہیں تو فوجی آپشن استعمال کیے جانے کا امکان موجود ہے۔
دوسری جانب ایران کی جانب سے بارہا کہا گیا ہے کہ اس کا جوہری پروگرام پرامن مقاصد کے لیے ہے اور وہ اپنی دفاعی صلاحیتوں پر کوئی سمجھوتہ نہیں کرے گا، جس کے باعث دونوں ممالک کے درمیان کشیدگی برقرار ہے۔
About The Author
