اسلام آباد – او آئی سی نے اسرائیل میں تعینات امریکی سفیر کے حالیہ بیان کو مسترد کرتے ہوئے اسے ناقابل قبول قرار دیا ہے، جبکہ سعودی عرب نے بھی اس معاملے پر امریکی محکمہ خارجہ سے باضابطہ وضاحت طلب کر لی ہے۔
میڈیا رپورٹس کے مطابق اسرائیل میں امریکی سفیر مائیک ہکابی نے ایک بیان میں کہا تھا کہ پورے مشرق وسطیٰ پر اسرائیل کا کنٹرول “قابل قبول” ہو سکتا ہے، جس پر مسلم دنیا میں شدید ردعمل سامنے آیا ہے۔
او آئی سی نے اپنے ردعمل میں کہا کہ اس نوعیت کے بیانات بین الاقوامی قوانین، اقوام متحدہ کی قراردادوں اور فلسطینی عوام کے جائز حقوق کے منافی ہیں، اور یہ خطے میں کشیدگی بڑھانے کا باعث بن سکتے ہیں۔
دوسری جانب سعودی عرب نے امریکی سفیر کے بیان کو غیر ذمہ دارانہ قرار دیتے ہوئے کہا کہ ایسے بیانات نہ صرف بین الاقوامی قانون کی خلاف ورزی ہیں بلکہ مشرق وسطیٰ میں امن و استحکام کے لیے بھی خطرہ بن سکتے ہیں۔ سعودی وزارت خارجہ کے مطابق اس معاملے پر واشنگٹن سے فوری وضاحت طلب کی گئی ہے۔
تجزیہ کاروں کے مطابق یہ بیان ایسے وقت سامنے آیا ہے جب غزہ کی صورتحال، فلسطین اسرائیل تنازع اور خطے کی سیکیورٹی پہلے ہی انتہائی حساس مرحلے میں ہے، جس کے باعث سفارتی سطح پر مزید کشیدگی کا خدشہ ظاہر کیا جا رہا ہے۔
About The Author
