پرتگال کے کیتھولک چرچ نے پادریوں کے ہاتھوں جنسی زیادتی کا شکار ہونے والے 57 متاثرین کو مجموعی طور پر 1.85 ملین ڈالر (تقریباً 1.6 ملین یورو) معاوضہ دینے کا اعلان کیا ہے۔ یہ فیصلہ ایک طویل عرصے سے جاری تحقیقات اور متاثرین کے مطالبات کے بعد سامنے آیا ہے۔
رپورٹس کے مطابق چرچ کی جانب سے قائم فنڈ کے ذریعے یہ ادائیگیاں کی جائیں گی، جس میں متاثرہ افراد کو انفرادی طور پر 9 ہزار سے 45 ہزار یورو تک معاوضہ دیا جائے گا۔
فروری 2023 میں ایک کمیشن کی رپورٹ میں انکشاف ہوا تھا کہ گزشتہ 70 برسوں کے دوران پرتگال میں کم از کم 4,815 بچوں اور کمزور بالغ افراد کو کیتھولک پادریوں کی جانب سے جنسی زیادتی کا نشانہ بنایا گیا۔
پرتگالی بشپس کی کانفرنس نے اپنے بیان میں کہا کہ مالی معاوضہ متاثرین کے ساتھ ہونے والے ظلم کو ختم نہیں کر سکتا، تاہم یہ ایک اخلاقی ذمہ داری اور معذرت کا اظہار ہے۔ چرچ نے متاثرین سے دوبارہ معذرت کرتے ہوئے کہا کہ وہ ہونے والے نقصان کو تسلیم کرتا ہے۔
رپورٹس کے مطابق معاوضے کے لیے 95 افراد نے درخواست دی، جن میں سے 67 کو اہل قرار دیا گیا جبکہ 57 درخواستیں منظور ہو چکی ہیں۔ باقی درخواستوں کا جائزہ ابھی جاری ہے۔
About The Author
