پنجاب حکومت نے اسامہ شیرون کو Pakistan Cricket Board میں خدمات انجام دینے کے لیے این او سی جاری کر دیا ہے، جس کے بعد ان کی بورڈ میں اہم انتظامی ذمہ داری سنبھالنے کی راہ ہموار ہو گئی ہے۔
اسامہ شیرون اس وقت گریڈ 17 کے افسر ہیں اور ڈپٹی سیکریٹری ہاؤسنگ، اربن ڈیولپمنٹ اینڈ پبلک ہیلتھ انجینئرنگ ڈیپارٹمنٹ میں خدمات انجام دے رہے ہیں۔ این او سی کے اجرا کے بعد وہ پی سی بی میں سینئر جنرل منیجر ڈومیسٹک کرکٹ آپریشنز کے طور پر فرائض انجام دیں گے۔
ذرائع کے مطابق یہ تقرری پی سی بی کے ڈومیسٹک کرکٹ ڈھانچے کو مزید مستحکم بنانے کی کوششوں کا حصہ ہے، جہاں انتظامی اور پیشہ ورانہ مہارت رکھنے والے افسران کو اہم ذمہ داریاں دی جا رہی ہیں۔
دوسری جانب، ڈومیسٹک کرکٹ کے شعبے میں دیگر تبدیلیاں بھی زیر غور ہیں، اور سابق فرسٹ کلاس کرکٹر اسامہ نیازی کی بورڈ میں ممکنہ شمولیت کی اطلاعات بھی سامنے آئی ہیں۔
یاد رہے کہ عبداللہ خرم نیازی، جو ڈپوٹیشن پر ڈائریکٹر ڈومیسٹک کے طور پر خدمات انجام دے رہے تھے، دوبارہ سرکاری ذمہ داریاں سنبھال چکے ہیں، جبکہ سابق کرکٹر جنید ضیاء بدستور ڈومیسٹک کرکٹ میں سینئر جنرل منیجر کے عہدے پر کام کر رہے ہیں۔
About The Author
