فرانس نے شاندار کارکردگی کا مظاہرہ کرتے ہوئے پہلے کوارٹر فائنل میں مراکش کو 0-2 سے شکست دے کر سیمی فائنل کے لیے کوالیفائی کر لیا۔
میچ کے آغاز سے ہی فرانسیسی ٹیم نے جارحانہ انداز اپنایا اور گیند پر اپنا کنٹرول برقرار رکھا، جبکہ مراکش نے بھی منظم دفاع کے ذریعے حریف کے حملوں کو روکنے کی کوشش کی۔
پہلے ہاف میں فرانس کو پنالٹی کا سنہری موقع ملا، تاہم کپتان اور اسٹار فارورڈ کائلیان ایمباپے اس موقع سے فائدہ نہ اٹھا سکے اور مراکش کے گول کیپر نے شاندار سیو کرتے ہوئے اپنی ٹیم کو نقصان سے بچا لیا۔
دوسرے ہاف میں فرانس نے حملوں کا سلسلہ مزید تیز کر دیا۔ میچ کے 60ویں منٹ میں ایمباپے نے خوبصورت گول اسکور کرکے اپنی ٹیم کو برتری دلائی، جبکہ صرف 66ویں منٹ میں عثمان ڈیمبیلے نے ایک اور گول کر کے اس برتری کو دگنا کر دیا۔
دو گول کے خسارے کے بعد مراکش نے واپسی کی بھرپور کوشش کی، لیکن فرانسیسی دفاع نے انہیں واضح مواقع پیدا کرنے نہیں دیے۔ اٹلس لائنز کی جانب سے میچ کا واحد آن ٹارگٹ شاٹ آخری لمحات میں آیا، جسے فرانس کے گول کیپر نے باآسانی روک لیا۔
اس کامیابی کے ساتھ فرانس مسلسل تیسری بار فیفا ورلڈ کپ کے سیمی فائنل میں پہنچ گیا، جہاں اس کا مقابلہ اسپین اور بیلجیم کے درمیان ہونے والے دوسرے کوارٹر فائنل کی فاتح ٹیم سے ہوگا۔
About The Author
