لیجنڈری اداکار عابد کشمیری 74 برس کی عمر میں انتقال کرگئے

لاہور:سٹیج، ٹی وی اورفلموں کے لیجنڈری اداکار عابد کشمیری کچھ عرصہ علیل رہنے کے بعد لاہور میں انتقال کرگئے، ان کی عمر74 برس تھی ، مرحوم نے اپنے پسماندگان میں دو بیٹے اور دو بیٹیاں چھوڑی ہیں، عابد کشمیری4 مئی 1950 ء کو لاہور میں پیدا ہوئے۔
انہوں نے سینکڑوں ٹی وی ڈراموں،سٹیج اور فلموں میں اداکاری کے جوہردکھائے، اپنی بے ساختہ مزاحیہ اداکاری کے باعث وہ کئی سال شائقین کے دلوں پر راج کرتے رہے،
مرحوم کے معروف ڈراموں میں لوہاری گیٹ، سورج کے ساتھ ساتھ، تیسرا کنارہ اور اپنے لوگ سمیت دیگر ڈرامے شامل ہیں،ڈرامہ” سمندر” میں عابد کشمیری کا کردار گلو بادشاہ بہت مقبول ہوا تھا جس نے انہیں شہرت کی بلندیوں تک پہنچا دیا ۔
انہیں1988 ء میں ریلیز ہونے والی فلم ”بازار حسن ”پر بہترین مزاحیہ اداکاری کرنے پر نگار ایوارڈ سے بھی نوازا گیا، ان کی مشہور فلموں میں جیتے ہیں شان سے اور آہٹ بھی شامل ہیں،مرحوم عابد کشمیری کی نمازجنازہ کا اعلان بعد میں کیا جائیگا۔