لاہور (وژن پوائنٹ نیوز)پاکستان میں میڈیکل کی تعلیم مکمل کرنے کے لئے فلسطینی طلبہ کا پہلا گروپ مصری دارالحکومت قاہرہ سے لاہور پہنچ گیا ہے۔ قاہرہ میں پاکستان کے سفارت خانے سے جاری بیان کے مطابق پاکستانی سفارت خانے کے حکام اور الخدمت فاؤنڈیشن کے نمائندوں نے فلسطینی طلبہ کو قاہرہ کے انٹرنیشنل ایئر پورٹ سے رخصت کیا۔
گروپ 192 فلسطینی طلبہ پر مشتمل ہے جو پاکستان میں مختلف میڈیکل کالجز میں ایم بی بی ایس اور بی ڈی ایس کی تعلیم مکمل کریں گے۔ وزیر اعظم محمد شہباز شریف کے احکامات پر فلسطینی طلبہ کو پاکستان کے میڈیکل اینڈ دینٹل کالجز میں اپنی تعلیم مفت مکمل کرنے کی سہولت فراہم کی جائے گی، اس سلسلے میں دیگر ادارے گلوبل ریلیف ٹرسٹ، ڈاکٹرز آف رحمٰن اور الخدمت فاؤنڈیشن بھی معاونت کر رہے ہیں۔
