پاکستان کے آرمی چیف، فیلڈ مارشل عاصم منیر نے ایران کے چیف مذاکرات کار محمد باقر غالب سے ملاقات میں خطے میں امن اور استحکام کی بحالی کے لیے کوششیں جاری رکھنے کے عزم کا اظہار کیا ہے۔
ایرانی خبررساں ادارے ISNA کے مطابق دونوں رہنماؤں کے درمیان ملاقات پیر کو تہران میں ہوئی۔ ملاقات میں علاقائی امن، سلامتی اور جاری تنازع کے پرامن حل سے متعلق امور پر تبادلہ خیال کیا گیا۔
پاکستانی فوج کے مطابق فیلڈ مارشل عاصم منیر کا دورہ خطے میں تنازع کے پرامن، پائیدار اور جامع حل کے لیے اسلام آباد کی سفارتی اور سیاسی کوششوں کا حصہ ہے۔
ملاقات کے دوران محمد باقر غالب نے اسلام آباد مفاہمت کی یادداشت کے تحت امریکا کی جانب سے کیے گئے وعدوں پر بھی بات کی۔
ایرانی چیف مذاکرات کار نے مؤقف اختیار کیا کہ مفاہمت کی یادداشت کے تحت دونوں فریقوں کی ذمہ داریاں واضح ہیں۔ انہوں نے الزام عائد کیا کہ امریکا نے اپنے وعدوں پر عمل نہیں کیا، جس سے خطے میں استحکام کی بحالی کی کوششوں کو نقصان پہنچا۔
غالب نے کہا کہ ایران مفاہمت کی یادداشت کی شرائط پر عمل درآمد کے لیے کوششیں جاری رکھے ہوئے ہے۔ ان کے مطابق اب امریکا کو معاہدے کے تحت اپنی ذمہ داریاں پوری کرنی چاہئیں۔
ملاقات میں فیلڈ مارشل عاصم منیر نے خطے میں استحکام کی بحالی کے لیے پاکستان کی کوششیں جاری رکھنے کے عزم کا اعادہ کیا۔
About The Author
