صدر آصف زرداری ویانا سے لندن پہنچ گئے، دو ہفتے قیام متوقع -

صدر پاکستان آصف علی زرداری ویانا سے لندن پہنچ گئے ہیں۔ ذرائع کے مطابق صدر زرداری برطانیہ میں تقریباً دو ہفتے قیام کریں گے۔ ان کے لندن قیام کے دوران مختلف طبی معائنے بھی متوقع ہیں۔

ذرائع کا کہنا ہے کہ صدر آصف زرداری لندن میں قیام کے دوران سیاسی سرگرمیوں میں حصہ نہیں لیں گے۔ تاہم ان سے مختلف وفود کی ملاقاتیں متوقع ہیں۔ صدر زرداری کی لندن میں موجودگی کے دوران اہم شخصیات سے ملاقاتوں کا امکان ہے۔

صدر آصف علی زرداری کے ہمراہ سینیٹر سلیم مانڈوی والا بھی لندن پہنچے ہیں۔ ان کے ذاتی معالج ڈاکٹر عاصم حسین بھی صدر کے ساتھ موجود ہیں۔ ذرائع کے مطابق صدر زرداری کے طبی معائنے لندن کے قیام کا اہم حصہ ہوں گے۔

ذرائع کے مطابق آصف علی زرداری تقریباً چھ سال بعد برطانیہ پہنچے ہیں۔ادھر چیئرمین پاکستان پیپلز پارٹی بلاول بھٹو زرداری کی بھی لندن آمد متوقع ہے۔ ذرائع کے مطابق بلاول بھٹو زرداری آئندہ چند روز میں لندن پہنچ سکتے ہیں۔