وزیراعظم شہباز شریف کرغزستان کا دورہ مکمل کرکے پاکستان پہنچ گئے -

اسلام آباد: وزیراعظم محمد شہباز شریف کرغزستان کا سرکاری دورہ مکمل کرکے پاکستان پہنچ گئے۔ وزیراعظم نے کرغزستان میں اعلیٰ سطح کی ملاقاتیں اور اہم مذاکرات کیے۔ دورے کے اختتام پر کرغزستان کے صدر صادر ژاپاروف نے وزیراعظم شہباز شریف کو الوداع کیا۔ صدر ژاپاروف خود گاڑی چلا کر وزیراعظم کو ایئرپورٹ لے کر پہنچے۔ اس اقدام کو دونوں ممالک کے قریبی تعلقات اور کرغزستان کی خصوصی مہمان نوازی کا اظہار قرار دیا گیا ہے۔

جاری اعلامیے کے مطابق صدر صادر ژاپاروف کا وزیراعظم کو خود ایئرپورٹ تک پہنچانا اہم سفارتی پیش رفت ہے۔ اسے پاکستان اور کرغزستان کے برادرانہ تعلقات کی مضبوطی کی علامت قرار دیا گیا۔ اعلامیے کے مطابق دونوں ممالک دوطرفہ روابط کو مزید وسعت دینے کے خواہاں ہیں۔

روانگی سے قبل ایئرپورٹ پر گفتگو کرتے ہوئے وزیراعظم شہباز شریف نے دورے کے نتائج پر بات کی۔ انہوں نے کہا کہ کرغزستان کے ساتھ ہونے والی ملاقاتیں انتہائی مثبت رہیں۔ وزیراعظم کے مطابق دونوں ممالک نے باہمی تجارت بڑھانے پر اتفاق کیا ہے۔ انہوں نے کہا کہ موجودہ تجارتی حجم میں نمایاں اضافہ کرنے کی تجویز دی گئی ہے۔