واشنگٹن:سابق امریکی صدر ڈونلڈ ٹرمپ نے کہا ہے کہ وہ ملک کے صدر بن کر امریکی فوجیوں کو جنگیں لڑنے کے لئے بیرون ملک نہیں بھیجیں گے جبکہ ان کی حریف کملا ہیرس کامیابی کی صورت میں امریکا کو تیسری عالمگیر جنگ کی طرف لے جائیں گی جس میں لاکھو ں امریکیوں کی جانیں جا سکتی ہیں.
رشیا ٹوڈے کی رپورٹ کے مطابق ریاست پنسلوانیا انتخابی ریلی سے خطاب کرتے ہوئے ڈونلڈ ٹرمپ نے وعدہ کیا کہ وہ امریکیوں کو ان ممالک میں لڑنے اور مرنے کے لیے نہیں بھیجیں گے جن کے بارے میں انہوں نے کبھی نہیں سنا ۔انہوں نے دعویٰ کیا کہ وہ واحد شخص ہیں جو عالمی تنازعات کو روکنے کی صلاحیت رکھتے ہیں ۔
انہوں نے کہا کہ ان کی حریف کملا ہیرس کا امریکا کا صدر بن جانا ایک بہت بڑا جوا ہو گا، ایسی صورت میں امریکا کے بیٹے اور بیٹیاں ایک ایسے ملک میں جنگ لڑنے کے لیے تیار ہو جائیں گے جس کے بارے میں آپ نے کبھی نہیں سنا ہوگا ۔امریکی صدارتی امیدوار ڈونلڈ ٹرمپ قبل ازیں یہ بھی کہہ چکے ہیں کہ وہ ہر اس بین الاقوامی بحران کو ختم کرنے کا عزم کئے ہوئے ہیں جو موجودہ انتظامیہ نے پیدا کیا ہے ، خاص طور پر یوکرین اور غزہ میں جاری جنگیں ۔
ا نہوں نے کہا کہ صدر جو بائیڈن اور نائب صدر کملا ہیرس کی قیادت میں دوسرے لوگوں کی جنگوں کی حمایت اور مالی اعانت سے امریکا کے تیسری عالمگیر جنگ میں ملوث ہو جانے کے امکانات کو بڑھا رہا ہے۔ ڈونلڈ ٹرمپ یہ بھی کہہ چکے ہیں کہ صدارتی انتخاب میں کامیابی کی صورت میں وہ اپنے عہدے کا حلف اٹھانے سے بھی پہلے روس اور یوکرین کو مذاکرات پر مجبور کر سکتے ہیں اور 24 گھنٹوں کے اندر یوکرین جنگ کو بند کرا سکتےہیں۔
