آبنائے ہرمز کے بحران اور سعودی عرب کو درپیش حملوں کے خدشات کا حل نکل آئے گا، ٹرمپ -

امریکی صدر ڈونلڈ ٹرمپ نے کہا ہے کہ آبنائے ہرمز کے بحران اور سعودی عرب کو درپیش حملوں کے خدشات کا حل نکل آئے گا۔ انہوں نے کہا کہ خطے کی صورتحال جلد بہتر ہو سکتی ہے۔ ٹرمپ نے یہ بیان آئرلینڈ کے دورے کے دوران آئرش صدر کیتھرین کونولی سے ملاقات کے بعد ڈبلن میں صحافیوں سے گفتگو کرتے ہوئے دیا۔

امریکی صدر نے بتایا کہ ملاقات کے دوران امریکا اور آئرلینڈ کے درمیان تجارت سمیت مختلف امور پر گفتگو ہوئی۔ٹرمپ نے کہا کہ امریکا اور آئرلینڈ مل کر بہت اچھا کام کر رہے ہیں۔ انہوں نے دونوں ممالک کے درمیان تعاون کو مثبت قرار دیا۔

صحافیوں نے امریکی صدر سے پوچھا کہ کیا امریکا سعودی عرب سے متعلق تازہ خطرات کے درمیان آبنائے ہرمز سے اہم تجارتی بحری آمدورفت بحال کرانے میں مدد کر سکتا ہے؟اس پر ڈونلڈ ٹرمپ نے کہا کہ سعودی ولی عہد محمد بن سلمان ان کے اچھے دوست ہیں اور سب کچھ ٹھیک ہو جائے گا۔

ٹرمپ نے مزید کہا کہ سعودی عرب کی اہم تیل پائپ لائن پر ہونے والے حملے میں ایران کے ملوث ہونے کا امکان ہے۔ انہوں نے یہ بھی دعویٰ کیا کہ یمن کے حوثی امریکا کے ساتھ براہ راست لڑائی نہیں چاہتے۔

امریکی صدر نے آبنائے ہرمز کے بارے میں کہا کہ یہ آبنائے امریکا کے کنٹرول میں ہے۔ انہوں نے یہ بھی پیش گوئی کی کہ ایران کے ساتھ جنگ ممکنہ طور پر امریکا کے وسط مدتی انتخابات کے فوراً بعد ختم ہو جائے گی۔