امریکہ کی وال اسٹریٹ میں ٹرمپ کی جیت کے بعد تیزی کا تسلسل جاری ہے،، نیویارک اسٹاک مارکیٹ میں ایلون مسک کی کمپنی ٹیسلا کی مالیت ایک ہزار ارب ڈالر (ایک ٹریلین ڈالر) سے تجاوز کر گئی،، ایلون مسک ٹرمپ کے سب سے بڑے اتحادی ہیں،، ٹرمپ صدارتی انتخابی مہم میں ایلون مسک نے بڑھ چڑھ کر حصہ لیا تھا،،
کاروباری ہفتے کے آخری دن جمعہ کو ٹیسلا کے حصص کی قیمت میں 8 فیصد اضافہ ہوا،، اس ہفتے کے چار روز کے کاروباری سیشن میں ٹیسلا کے شیئرز کی قیمت 29 فیصد بڑھی ہے،،
منگل کو ٹیسلا کی مالیت 807 ارب ڈالر تھی جو جمعہ کو ایک ہزار ارب ڈالر سے تجاوز کر گئی،، ایک سال میں ٹیسلا کے حصص کی قیمت میں 30 فیصد کا بڑا اضافہ ریکارڈ کیا گیا ہے،،
امریکی صدارتی انتخابات میں ریپبلکنز امیدوار کی کامیابی کا سہرا ایلون مسک کے ڈونلڈ ٹرمپ کے ساتھ اتحاد کو دیا جارہا ہے۔
گزشتہ روز امریکی ریاست فلوریڈا میں اپنی فتح کی تقریر کرتے ہوئے ڈونلڈ ٹرمپ نے ایلون مسک کو ’ہیرا‘ اور ’ابھرتا ہوا ستارہ‘ قرار دیا تھا۔
ڈونلڈ ٹرمپ کی کامیابی کے بعد ایلون مسک نے مائیکرو بلاگنگ پلیٹ فارم ایکس پر لکھا تھا کہ’ مستقبل بہت شاندار ہونے والا ہے۔’
ایلون مسک نے 2024 کے انتخابات سے قبل ڈونلڈ ٹرمپ اور دیگر ریپبلکنز کو تقریباً 13 کروڑ 20 لاکھ ڈالر عطیہ کیے۔۔۔ ان کی جانب سے دو سب سے بڑی عطیات 4 کروڑ 36 لاکھ اور 7 کروڑ 50 لاکھ ڈالر براہ راست نومنتخب امریکی صدر کی انتخابی مہم میں دی گئیں۔
ان کا سوشل میڈیا پلیٹ فارم ایکس ڈونلڈ ٹرمپ کی فتح میں اہم ہتھیار ثابت ہوا جس پر ایلون مسک کے اثرورسوخ نے ریپبلکن پارٹی کے حق میں نمایاں کردار ادا کیا۔
الجزیرہ کی رپورٹس کے مطابق ایلون مسک پر ڈونلڈ ٹرمپ کی تشہیر کرنے اور اپنے 20 کروڑ فالورز میں غلط معلومات پھیلانے کا الزام عائد کیا گیا تھا۔
امریکی صدر کی صدارتی مہم کی جانب سے ایلون مسک کو’ صدیوں میں ایک بار پیدا ہونے والا کاروباری رہنما قرار دیا’ اور کہا گیا کہ وفاقی بیوروکریسی کے بگڑے ہوئے نظام کو ان کے خیالات اور کام کرنے کے طور طریقوں سے یقینی طور پر فائدہ ہوگا۔
رائٹرز نے ذرائع کا حوالہ دیتے ہوئے بتایا کہ ایلون مسک کا ڈونلڈ ٹرمپ کے ساتھ اتحاد ان کے حق میں کام کر سکتا ہے، جس سے ان کی کمپنیوں کو ’حکومت کی طرف سے سازگار رویہ‘ حاصل ہوگا اور وہ ضوابط یا قانون سازی سے محفوظ رہیں گی۔
واضح رہے کہ ایلون مسک کے کاروباری مفادات ٹیسلا کی برقی گاڑیوں سے لے کر اسپیس ایکس کے راکٹوں اور نیورالنک برین چپس تک حکومت کے ضوابط، سبسڈیز یا پالیسی پر کافی انحصار کرتے ہیں۔’
