اسلام آباد:پاکستان مسلم لیگ (ن) کے سابق سیکرٹری اطلاعات، وزیراعظم کے سابق پریس سیکریٹری، ہائوس بلڈنگ فنانس کارپوریشن اور متروکہ وقف املاک بورڈ کے سابق چیئرمین محمد صدیق الفاروق طویل علالت کے بعداتوار کو وفات پا گئے ہیں۔
ان کی نماز جنازہ (کل) بروز پیر مورخہ 16 دسمبر 2024 کو صبح 11 بجے ایچ الیون اسلام آباد کے قبرستان میں ادا کی جائے گی۔
وزیراعظم محمد شہباز شریف نے پاکستان مسلم لیگ ن کے سینئر رہنما ، ہاؤس بلڈنگ فنانس کارپوریشن اور متروکہ وقف املاک بورڈ کے سابق چئیر مین صدیق الفاروق کے انتقال پر گہرے رنج اور افسوس کا اظہار کرتے ہوئے مرحوم کے درجات کی بلندی کی دعا کی اور ان کے اہل خانہ سے اظہار تعزیت بھی کیا۔
وزیر اعظم آفس پریس ونگ سے اتوار کو جاری تعزیتی بیان میں وزیر اعظم نے کہا کہ مرحوم صدیق الفاروق کی پاکستان مسلم لیگ ن کے لئے خدمات ہمیشہ یاد رکھی جائیں گی ،ان کے انتقال سے پارٹی ایک مخلص اور زیرک سیاستدان سے محروم ہو ہو گئی ہے۔ وزیراعظم محمد شہباز شریف نے دعا کی کہ اللہ تعالیٰ مرحوم کو جنت الفردوس میں جگہ عطاء فرمائے۔
وزیراعلیٰ پنجاب مریم نواز نے بھی مسلم لیگ ن کے سابق سیکرٹری اطلاعات صدیق الفاروق کے انتقال پر اظہار تعزیت کیا ہے۔
