پاکستان نے برطانیہ سے مطالبہ کیا ہے کہ لندن میں واقع پاکستانی ہائی کمیشن پر ہونے والے حالیہ پرتشدد حملے میں ملوث عناصر کے خلاف فوری اور مؤثر کارروائی کی جائے۔
اتوار کی صبح ہائی کمیشن پر پتھراؤ کیا گیا، جس کے پیچھے 25 اپریل کے ایک متنازعہ مظاہرے کو وجہ قرار دیا جا رہا ہے۔
اس مظاہرے میں مبینہ طور پر برطانوی بھارتی کمیونٹی کے ارکان نے پاکستان مخالف اور اسلاموفوبک نعرے لگائے، جس پر پولیس کے ساتھ جھڑپیں اور متعدد گرفتاریاں ہوئیں۔
میٹروپولیٹن پولیس نے واقعے میں انکیت محبت نامی مشتبہ شخص کو گرفتار کر لیا ہے، جبکہ حملے کی مزید تحقیقات جاری ہیں۔ مشتبہ شخص کی قومیت فی الحال ظاہر نہیں کی گئی۔پاکستانی ہائی کمیشن نے واقعے کی مکمل تفصیلات حاصل کرنے کے لیے مقامی حکام سے قریبی رابطہ قائم رکھا ہے۔
ہائی کمیشن نے اپنے بیان میں کہا "ہم توقع رکھتے ہیں کہ گرفتار شدگان سمیت تمام ملوث افراد کے خلاف برطانوی قانون کے مطابق مقدمہ چلایا جائے۔”ساتھ ہی برطانوی حکومت کو ویانا کنونشن کی یاد دہانی کرواتے ہوئے زور دیا گیا کہ وہ سفارتی مشنز اور عملے کی تحفظ کی ذمہ داری پوری کرے۔
یہ پہلا موقع نہیں کہ برطانیہ میں پاکستان کے سفارتی مراکز کو خطرات کا سامنا ہوا ہو۔ ہائی کمیشن نے حفاظتی اقدامات میں فوری اضافہ کرنے کی اپیل کی ہے تاکہ مزید واقعات سے بچا جا سکے۔
پاکستان نے اپنے تحفظات کا اعادہ کرتے ہوئے تین واضح مطالبات کیے:
- حملے اور مظاہرے میں شامل تمام افراد پر مقدمہ
- برطانیہ بھر میں پاکستانی سفارتی مشنز کی سخت سیکیورٹی
- سفارتی پروٹوکول اور عالمی قوانین کی مکمل پاسداری
پاکستانی حکام نے حالیہ دورۂ لندن میں ہائی کمیشن پر بڑھتے ہوئے خطرات پر گہری تشویش کا اظہار کیا اور جامع اور فوری ردعمل کا مطالبہ کیا ہے۔
About The Author
