وزیراعظم شہباز شریف سے عوامی جمہوریہ چین کے سفیر جیانگ زیڈونگ نے اسلام آباد میں ملاقات کی، جس میں دونوں ممالک کے درمیان اسٹریٹجک تعلقات، خطے کی صورتحال، انسدادِ دہشت گردی، اور باہمی تعاون پر تفصیلی بات چیت ہوئی۔
شہباز شریف کی گفتگو کے نمایاں نکات
- وزیراعظم نے چینی صدر شی جن پنگ اور وزیراعظم لی چیانگ کے لیے نیک خواہشات کا اظہار کیا۔
- جنوبی ایشیا میں پاکستان کے مؤقف کی غیر متزلزل حمایت پر چین کا شکریہ ادا کیا۔
- 22 اپریل کے واقعے پر چین کے مؤقف کو سراہا اور بین الاقوامی تحقیقات کی حمایت پر اظہار تشکر کیا۔
- پاکستان کی دہشت گردی کے خلاف قربانیاں یاد دلائیں:
- 90 ہزار جانوں کا نذرانہ
- 152 ارب ڈالر سے زائد کا معاشی نقصان
وزیراعظم نے بھارت کی حالیہ جارحانہ پالیسیوں پر سخت تحفظات کا اظہار کرتے ہوئے کہا”بھارت پانی کو ہتھیار کے طور پر استعمال کر رہا ہے، جو سندھ طاس معاہدے کی روح کے منافی ہے۔”
انہوں نے مزید کہا کہ بھارت کے اقدامات پاکستان کی توجہ افغانستان سے کام کرنے والی تنظیموں جیسے آئی ایس کے پی، ٹی ٹی پی اور بی ایل اے کے خلاف جاری کارروائیوں سے ہٹا سکتے ہیں۔
شہباز شریف نے جموں و کشمیر کے مسئلے کو جنوبی ایشیا میں دیرپا امن کے لیے بنیادی قرار دیتے ہوئے کہا”اس دیرینہ تنازع کا پرامن حل ہی خطے کے استحکام کی ضمانت بن سکتا ہے۔”
چینی سفیر جیانگ زیڈونگ نے پاکستان کی قربانیوں اور مؤقف کو سراہا، اور اس عزم کا اعادہ کیا کہ”چین ہمیشہ پاکستان کی خودمختاری، علاقائی استحکام اور امن کی کوششوں میں ساتھ کھڑا رہے گا۔”
About The Author
