گلگت بلتستان کے ضلع دیامیر میں سیلاب میں بہہ جانے والے 12 سیاحوں کی لاشیں تاحال نہ نکالی جا سکیں۔ صوبائی حکومت نے 14 روز سے جاری تلاش کا آپریشن ختم کرنے کا اعلان کر دیا۔۔
صوبائی حکومت کے ترجمان فیض اللہ فراق کا کہنا ہے کہ دریا میں ڈوب جانے والے سیاحوں کے زندہ بچنے کی امید ختم ہو چکی ہے جس کے باعث آپریشن روک دیا گیا ہے۔۔ ان کا کہنا تھا کہ مقامی لوگوں اور ریسکیو اہلکاروں نے سیاحوں کی تمام گاڑیاں نکال لی ہیں لیکن لاپتہ سیاحوں کی لاشیں نہیں مل سکیں۔۔
سرچ آپریشن کے اختتام پر دیامیر میں تمام لاپتا افراد کی غائبانہ نماز جنازہ ادا کر دی گئی ہے۔
یاد رہے کہ بابوسر کے علاقے میں 20 جولائی کو آنے والے سیلاب میں 20 گاڑیاں اور متعدد سیاح سیلاب میں بہہ کر لاپتا ہو گئے تھے، جن میں سے 9 افراد کی لاشیں نکال لی گئی تھیں۔
نجی ٹی وی کی اینکر شبانہ لیاقت کے خاندان کے 4 افراد اور ننکانہ صاحب سے تعلق رکھنے والے ایک خاندان کے 2 افراد سمیت 12 سیاحوں کی لاشوں کی تلاش کا عمل تاحال جاری تھا۔
پاک آرمی کے جوان سراغ رساں کتوں اور ڈیڈیکٹرز کی مدد سے سیلاب کے ملبے میں لاشیں تلاش کر رہے تھے، تاہم آج پیر کے روز حکومت نے لاشوں کی تلاش کے لیے جاری سرچ آپریشن ختم کرنے کا باقاعدہ اعلان کر دیا ہے۔
