لاہور — پاکستان کرکٹ بورڈ (پی سی بی) نے قومی ویمن کرکٹ ٹیم کے ہیڈ کوچ محمد وسیم کے عہدے کی مدت ختم کرنے کا باضابطہ اعلان کر دیا ہے۔
پی سی بی کے مطابق، محمد وسیم کی بطور ہیڈ کوچ مدت پوری ہو چکی ہے، اور بورڈ نے نئے ہیڈ کوچ کی تقرری کا عمل شروع کر دیا ہے۔
ترجمان نے بتایا کہ نئے کوچ کا اعلان جلد کیا جائے گا، تاہم اس حوالے سے مشاورت جاری ہے۔
محمد وسیم کو 2024 میں ویمن ٹیم کا ہیڈ کوچ مقرر کیا گیا تھا۔تاہم، ان کے دورِ قیادت میں ٹیم کی کارکردگی میں مسلسل زوال دیکھنے میں آیا، جس پر کرکٹ ماہرین اور شائقین کی جانب سے شدید تنقید کی گئی۔
ذرائع کے مطابق، پی سی بی کی مکمل حمایت کے باوجود ٹیم متوقع نتائج دینے میں ناکام رہی، جس کے بعد بورڈ نے تبدیلی کا فیصلہ کیا۔
پاکستان ویمن ٹیم کی قیادت فاطمہ ثناء کے سپرد تھی، تاہم ٹیم ورلڈ کپ 2025 میں ایک بھی میچ جیتنے میں کامیاب نہ ہو سکی۔
ٹیم ساتویں نمبر پر رہی اور محض تین پوائنٹس حاصل کر سکی۔
پاکستان کو بنگلادیش، بھارت، آسٹریلیا اور جنوبی افریقہ کے ہاتھوں بدترین شکستوں کا سامنا کرنا پڑا، جب کہ انگلینڈ اور سری لنکا کے خلاف میچز بارش کی نذر ہو گئے۔
پی سی بی کے ترجمان نے کہا “ہم محمد وسیم کی خدمات کے شکر گزار ہیں۔ نئے کوچ کے تقرر کے لیے شفاف اور میرٹ پر مبنی عمل جاری ہے۔ ٹیم کی بہتری اور مستقل مزاجی کے لیے درست فیصلے کیے جائیں گے۔”
ذرائع کا کہنا ہے کہ نئے کوچ کے انتخاب میں بین الاقوامی تجربے اور ٹیم منیجمنٹ اسٹرکچر کو بھی مدنظر رکھا جا رہا ہے۔
سابق کرکٹرز نے اس فیصلے کو درست سمت میں قدم قرار دیا ہے۔
ان کا کہنا ہے کہ خواتین کرکٹ میں پیشہ ورانہ کوچنگ اور نفسیاتی مضبوطی کی اشد ضرورت ہے تاکہ ٹیم کو عالمی معیار تک لایا جا سکے۔
About The Author
