کیف — یوکرین کے صدر ولودومیر زیلنسکی کے متوقع دورۂ امریکا سے قبل روس نے یوکرین پر ایک بڑا فضائی حملہ کر دیا ہے، جس کے نتیجے میں دارالحکومت کیف سمیت کئی شہروں میں شدید نقصان ہوا ہے۔
صدر زیلنسکی کے مطابق روسی افواج نے یوکرین کے مختلف علاقوں پر 40 میزائل اور 500 سے زائد ڈرونز داغے۔ ان حملوں کے نتیجے میں کیف میں متعدد رہائشی اور تجارتی عمارتیں تباہ ہو گئیں، جب کہ کئی علاقوں میں بجلی اور مواصلاتی نظام متاثر ہوا۔
ڈرون حملوں کے باعث کیف کے ایک رہائشی کمپلیکس کو براہِ راست نشانہ بنایا گیا، جس کی ویڈیو سوشل میڈیا پر سامنے آ چکی ہے۔ ویڈیو میں عمارت کو شدید نقصان پہنچتے دیکھا جا سکتا ہے۔ متاثرہ علاقوں میں ریسکیو اور امدادی کارروائیاں جاری ہیں، جب کہ ہلاکتوں اور زخمیوں کی حتمی تعداد کے بارے میں سرکاری طور پر تفصیلات جاری نہیں کی گئیں۔
روسی فضائی حملوں کے اثرات سرحد پار بھی محسوس کیے گئے۔ یوکرین کی صورتحال کے باعث پولینڈ کے دو ایئرپورٹس پر پروازیں عارضی طور پر معطل کر دی گئیں، تاہم بعد ازاں فضائی آپریشن بحال کر دیا گیا۔
یہ حملہ ایک ایسے وقت میں ہوا ہے جب یوکرینی صدر زیلنسکی امریکا کے دورے کی تیاری کر رہے ہیں، جہاں وہ فوجی امداد اور سفارتی حمایت کے حوالے سے اہم ملاقاتیں متوقع ہیں۔ مبصرین کے مطابق روسی حملے کو موجودہ سفارتی پیش رفت کے تناظر میں غیر معمولی اہمیت حاصل ہے۔
About The Author
