اسرائیل نے فلسطینیوں کی امداد کے لئے قائم UNRWA ہیڈ کوارٹر مسمار کر دیا، اقوام متحدہ نے حملہ قرار دیا
یروشلم — اسرائیل نے مشرقی یروشلم میں اقوام متحدہ کی ایجنسی برائے فلسطینی پناہ گزینوں (UNRWA) کے ہیڈ کوارٹر کو مسمار کر دیا، جس پر اقوام متحدہ نے اسے "بے مثال حملہ” قرار دیا ہے۔
اس اقدام کے پس منظر میں اسرائیل نے اکتوبر 2024 میں منظور کیے گئے ایک قانون کا حوالہ دیا، جس کے تحت UNRWA پر ملک میں کام کرنے کی پابندی عائد کی گئی تھی۔ اسرائیلی حکام نے ایجنسی پر حماس کے ساتھ ملی بھگت کا الزام بھی عائد کیا ہے۔ وزارت خارجہ نے کہا کہ "UNRWA اور اس کے اہلکار پہلے ہی اس مقام پر اپنی سرگرمیاں ختم کر چکے تھے اور کمپاؤنڈ پر قبضہ اسرائیلی اور بین الاقوامی قوانین کے مطابق کیا گیا۔”
UNRWA کے ترجمان جوناتھن فولر نے اے ایف پی کو بتایا کہ "اسرائیلی فورسز نے کمپاؤنڈ پر دھاوا بولا، یہ اقوام متحدہ اور اس کے احاطے کے خلاف ایک بے مثال حملہ ہے، اور بین الاقوامی قانون اور اقوام متحدہ کے مراعات کی سنگین خلاف ورزی ہے۔”
اس موقع پر اسرائیل کے قومی سلامتی کے وزیر اتمار بین گویر نے کہا کہ "یہ یروشلم میں خودمختاری کے لیے ایک اہم دن ہے، آج دہشت گردی کے حامیوں کو ان کی بنائی ہر چیز کے ساتھ یہاں سے نکالا جا رہا ہے۔”
اسرائیل نے طویل عرصے سے UNRWA کو بند کرنے کی کوشش کی ہے، یہ الزام عائد کرتے ہوئے کہ ایجنسی فلسطینی اولادوں کو پناہ گزین کا درجہ دے کر تنازعہ کو برقرار رکھتی ہے۔ اسرائیلی حکام کے مطابق غزہ میں ایجنسی کے 10 فیصد سے زائد عملے کے دہشت گرد دھڑوں سے تعلقات ہیں، اور تعلیم کے ذریعے نفرت اور دہشت گردی کو فروغ دیا جاتا رہا ہے۔
اقوام متحدہ نے اس حملے پر تشویش کا اظہار کرتے ہوئے کہا کہ یہ اقدام عالمی قوانین اور ادارے کی خودمختاری کے لیے سنگین خطرہ ہے۔
About The Author
