ٹوکیو – جاپان کی مرکزی اپوزیشن جماعت سینٹرسٹ ریفارم الائنس (سی آر اے) کے دو شریک رہنماؤں نے ایوانِ زیریں کے حالیہ انتخابات میں پارٹی کی تاریخی شکست کی ذمہ داری قبول کرتے ہوئے اپنے عہدوں سے استعفیٰ دینے کا اعلان کر دیا ہے۔
شنہوا کے مطابق سینٹرسٹ ریفارم الائنس، جو جنوری میں جاپان کی آئینی جمہوری پارٹی اور کومیتو پارٹی کے اشتراک سے قائم کی گئی تھی، اتوار کو ہونے والے انتخابات میں شدید نقصان سے دوچار ہوئی۔ انتخابی نتائج کے بعد پارٹی کی نشستیں تقریباً 170 سے کم ہو کر صرف 49 رہ گئیں۔
نئے قائم شدہ اپوزیشن اتحاد کے شریک رہنما یوشی ہیکو نوڈا اور تتسوؤ سائیتو نے پیر کے روز پارٹی کے بورڈ اجلاس میں اپنے استعفوں سے باضابطہ طور پر آگاہ کیا۔
یوشی ہیکو نوڈا نے پیر کی صبح ایک پریس کانفرنس میں کہا کہ انتخابی نتائج تباہ کن ہیں اور پارٹی قیادت کی حیثیت سے وہ اس کی ذمہ داری قبول کرتے ہیں۔ انہوں نے بتایا کہ نئی قیادت کا فیصلہ 18 فروری تک کر لیا جائے گا، تاکہ ایوانِ نمائندگان کے انتخابات کے بعد سانائے تاکائیچی کو دوبارہ جاپان کے وزیرِ اعظم کے عہدے پر بحال کرنے کے لیے ہونے والے پارلیمانی اجلاس کی تیاری کی جا سکے۔
سیاسی تجزیہ کاروں کے مطابق اس انتخابی شکست نے جاپان میں اپوزیشن سیاست کو شدید دھچکا پہنچایا ہے اور آئندہ سیاسی منظرنامے پر اس کے گہرے اثرات مرتب ہونے کا امکان ہے۔
About The Author
