Radio Caroline نے کمپیوٹر سسٹم میں خرابی کے باعث برطانیہ کے بادشاہ King Charles III کی وفات سے متعلق غلط اعلان نشر ہونے پر باقاعدہ معذرت کر لی ہے۔
ریڈیو انتظامیہ کے مطابق یہ واقعہ منگل کی دوپہر مشرقی ایسکس کے شہر مالڈن میں قائم مرکزی اسٹوڈیو میں پیش آیا، جہاں تکنیکی خرابی کے باعث ہنگامی نشریاتی نظام خودکار طور پر فعال ہو گیا۔ یہی نظام عام طور پر کسی بڑی قومی ہنگامی صورتحال، بالخصوص بادشاہ یا ملکہ کی وفات کی صورت میں استعمال کیا جاتا ہے۔
اسٹیشن منیجر پیٹر مور کے مطابق خرابی کے بعد وہ پروٹوکول بھی فعال ہو گیا جو برطانیہ کے تمام نشریاتی اداروں میں پہلے سے موجود ہوتا ہے۔ اس نظام کے تحت کچھ وقت کے لیے ریڈیو کی نشریات بھی معطل ہو گئیں، جس کے بعد عملے کو صورتحال کا علم ہوا۔
بعد ازاں نشریات بحال کر دی گئیں اور ریڈیو کی جانب سے آن ایئر معذرت بھی نشر کی گئی۔ انتظامیہ نے اپنے سوشل میڈیا بیان میں کہا کہ یہ ایک افسوسناک تکنیکی غلطی تھی جس پر شاہ چارلس سوم اور سامعین سے معذرت کی جاتی ہے۔
پیٹر مور نے کہا کہ ریڈیو کیرولائن کو ماضی میں شاہی خاندان کے اہم مواقع، جیسے کرسمس پیغامات، نشر کرنے کا اعزاز حاصل رہا ہے اور ادارہ مستقبل میں بھی یہ روایت برقرار رکھنا چاہتا ہے۔
About The Author
