ایران-امریکا کشیدگی میں مذاکرات ہی واحد راستہ ہے، چین -

چین نے ایک بار پھر واضح کیا ہے کہ بین الاقوامی تنازعات کے حل کا واحد مؤثر راستہ بات چیت اور مذاکرات ہیں، جبکہ طاقت کا استعمال کسی مسئلے کا پائیدار حل نہیں دے سکتا۔

چینی سرکاری نشریاتی ادارے سی جی ٹی این کے مطابق یہ مؤقف ماؤ نِینگ نے معمول کی پریس کانفرنس کے دوران پیش کیا۔

امریکہ اور ایران کے درمیان جاری کشیدگی سے متعلق سوال کے جواب میں انہوں نے کہا کہ جب بات چیت کے دروازے کھلے ہوں تو انہیں بند نہیں ہونا چاہیے، بلکہ صورتحال کو پرامن رکھنے کے رجحان کو مزید مضبوط بنایا جانا چاہیے۔

انہوں نے زور دیا کہ تمام فریقین کو سیاسی حل کی سمت میں آگے بڑھتے ہوئے مذاکرات کے ذریعے ایک دوسرے کے تحفظات دور کرنے چاہییں۔

ماؤ نِینگ کے مطابق عالمی سطح پر استحکام کے لیے ضروری ہے کہ بحری راستے کھلے رہیں اور بین الاقوامی برادری کی آواز کو مثبت انداز میں سنا جائے۔ انہوں نے کہا کہ عالمی صنعتی اور سپلائی چین کے تسلسل کو برقرار رکھنا بھی اجتماعی ذمہ داری ہے۔

چینی ترجمان نے مزید کہا کہ مشرق وسطیٰ میں پائیدار امن کے لیے فوری اور مکمل جنگ بندی ضروری ہے تاکہ خطہ بتدریج امن اور استحکام کی طرف بڑھ سکے۔