چیس فیڈریشن آف پاکستان کے نو منتخب عہدیداروں کی حلف برداری کی تقریب پاکستان اسپورٹس بورڈ کے کمیٹی روم میں منعقد ہوئی، جہاں وفاقی سیکرٹری بین الصوبائی رابطہ اور صدر پاکستان ہاکی فیڈریشن محی الدین وانی نے منتخب نمائندوں سے حلف لیا۔
تقریب کے دوران ذیشان نقوی نے چیس فیڈریشن آف پاکستان کے صدر کے عہدے کا حلف اٹھایا، جبکہ انور سلیم نے سینئر نائب صدر، آغا وسیم نے نائب صدر اول اور محمد وسیم نے نائب صدر دوم کی ذمہ داریاں سنبھالیں۔
اسی طرح انعام اللہ نے نائب صدر سوم، گوہر اقبال نے سیکرٹری جنرل، مصور خان نے فنانس سیکرٹری، واصف نثار نے جوائنٹ سیکرٹری اور شاہد خان نے پریس سیکرٹری کے عہدوں کا حلف اٹھایا۔
حلف برداری کی تقریب سے خطاب کرتے ہوئے محی الدین وانی نے کہا کہ پاکستان میں شطرنج کے کھیل کے فروغ کے لیے ہر ممکن تعاون فراہم کیا جائے گا۔ انہوں نے اعلان کیا کہ جلد پاکستان اسپورٹس بورڈ کے تحت چیس کے مقابلوں کا انعقاد بھی کیا جائے گا تاکہ نوجوان کھلاڑیوں کو اپنی صلاحیتیں دکھانے کے مزید مواقع میسر آسکیں۔
انہوں نے کہا کہ پاکستان میں شطرنج کے میدان میں بے پناہ ٹیلنٹ موجود ہے اور اگر اس صلاحیت کو مناسب مواقع اور سہولیات فراہم کی جائیں تو پاکستانی کھلاڑی عالمی سطح پر نمایاں کامیابیاں حاصل کر سکتے ہیں۔
تقریب کے شرکاء نے امید ظاہر کی کہ نئی منتخب قیادت ملک میں شطرنج کے کھیل کے فروغ، نوجوان ٹیلنٹ کی حوصلہ افزائی اور بین الاقوامی سطح پر پاکستان کی نمائندگی کو مزید مضبوط بنانے کے لیے مؤثر اقدامات کرے گی۔
About The Author
