ایران طویل عرصے سے میرے قتل کے درپے ہے، ضروری ہدایات جاری کر دی ہیں، ٹرمپ -

امریکی صدر ڈونلڈ ٹرمپ نے دعویٰ کیا ہے کہ ایران کئی برسوں سے انہیں قتل کرنے کی کوششوں میں مصروف ہے، تاہم ان کے بقول اس وقت ان کے خلاف کسی نئے ایرانی منصوبے کی اطلاعات موجود نہیں ہیں۔

امریکی اخبار نیویارک پوسٹ کو دیے گئے انٹرویو میں ٹرمپ نے کہا کہ انہوں نے اپنے قتل کی کسی بھی ممکنہ سازش کی صورت میں ردعمل سے متعلق پہلے ہی واضح ہدایات جاری کر رکھی ہیں۔

انہوں نے کہا، "میں کافی عرصے سے ان کی فہرست میں شامل ہوں۔ اگر میرے ساتھ کچھ بھی ہوتا ہے تو ایسی کارروائی کی جائے گی جس کی مثال انہوں نے پہلے کبھی نہیں دیکھی ہوگی۔”

ٹرمپ کا کہنا تھا کہ انہوں نے متعلقہ اداروں کو سخت ردعمل کے حوالے سے پیشگی ہدایات دے دی ہیں تاکہ کسی بھی ممکنہ حملے کی صورت میں فوری اور فیصلہ کن اقدام کیا جا سکے۔

ایک سوال کے جواب میں کہ آیا اسرائیل نے حالیہ دنوں ان کے قتل سے متعلق کوئی نئی انٹیلی جنس معلومات فراہم کی ہیں، امریکی صدر نے اس کی تردید کرتے ہوئے کہا کہ اسرائیل کی جانب سے کوئی نئی اطلاع موصول نہیں ہوئی۔

انہوں نے مزید کہا کہ ایران کی جانب سے ان کے قتل کا کوئی نیا منصوبہ سامنے نہیں آیا، تاہم ان کے مطابق تہران طویل عرصے سے انہیں اپنا ہدف سمجھتا رہا ہے۔

ٹرمپ نے کہا کہ "میں کافی عرصے سے ایران کی ہدف فہرست میں سرفہرست رہا ہوں، لیکن یہی زندگی کی حقیقت ہے۔”