پاکستان کے نامور پروفیشنل باکسر عثمان وزیر نے 26 ستمبر کو تھائی لینڈ میں انڈونیشین باکسر ایرگی آرگسٹا کے خلاف اپنی 19ویں پروفیشنل فائٹ کا اعلان کردیا۔نیشنل پریس کلب اسلام آباد میں پریس کانفرنس کرتے ہوئے عثمان وزیر نے کہا کہ پاکستان کا نام عالمی سطح پر روشن کرنا ان کا مشن ہے۔ وہ گلگت بلتستان اور بلوچستان کا نام بھی دنیا بھر میں اجاگر کرنا چاہتے ہیں۔
عثمان وزیر نے کہا کہ وہ 2015 سے بین الاقوامی سطح پر پروفیشنل باکسنگ کر رہے ہیں۔ اس دوران انہوں نے پاکستان کے لیے مختلف ٹائٹلز جیتے ہیں۔ ان کے مطابق 26 ستمبر کی فائٹ ان کے کیریئر کے لیے انتہائی اہم ہے۔ انہوں نے بتایا کہ اس مقابلے کے بعد وہ مزید بڑے ٹائٹلز کے لیے کوالیفائی کرنے کی کوشش کریں گے۔ ان کا کہنا تھا کہ وہ پاکستان کے نوجوانوں کے لیے ایک مثبت مثال بننا چاہتے ہیں۔
عثمان وزیر نے حکومت، اداروں اور نجی شعبے سے کھلاڑیوں کی مسلسل سرپرستی کی اپیل کی۔ انہوں نے کہا کہ پاکستانی کھلاڑیوں میں بے پناہ صلاحیت موجود ہے۔ ان کے مطابق عالمی سطح پر کامیابی کے لیے کھلاڑیوں کو مالی اور انتظامی تعاون کی ضرورت ہوتی ہے۔ تربیت، غذائیت، طبی سہولیات اور دیگر اخراجات بھی کھیلوں کا اہم حصہ ہیں۔ انہوں نے حکومت پاکستان، پاک فوج اور متعلقہ اداروں سے تمام کھیلوں اور کھلاڑیوں کو یکساں مواقع فراہم کرنے کی اپیل کی۔ ان کا کہنا تھا کہ مناسب سہولیات سے پاکستانی کھلاڑی عالمی سطح پر بہتر کارکردگی دکھا سکتے ہیں۔
About The Author
