اسلام آباد : 26 جنوری 2025 کو دارالحکومت اسلام آباد میں ملک کی سب سے بڑی میراتھن ریس کا انعقاد ہونےجارہا ہے۔اس ریس کا انعقاد مایہ ناز رننگ گروپ اسلام آباد ’’رن ود اس‘‘ کر رہا ہے
ناز برادران بشمول قاسم ناز اور ہاشم ناز نے 2016 میں آئی -آر- یو کی بنیاد رکھی۔سیریز کی پانچویں میراتھن میں پاکستان اور دنیا بھر سے دوڑنے والے افراد حصہ لے رہے ہیں۔یہ ایونٹ پاکستان میں میراتھن کے حوالے سے نئے معیار متعین کرے گا۔
میراتھن میں ملک بھر سے 3000 سے زائد رنرز کی شرکت متوقع ہے۔اس کے ساتھ سفارتی برادری کی ایک قابل ذکر تعداد بھی شامل ہو گی۔یہ میراتھن بین الاقوامی رنرز کو بھی اپنی طرف متوجہ کر رہی ہے۔
اس دلچسپ میراتھن میں یورپ اور امریکا سے بھی شرکاء شامل ہو رہے ہیں۔میراتھن ریس میں 5، 10 کلومیٹر ،فل اور ہاف میراتھن کیٹیگری مقابلے ہوں گے۔
چھوٹے بچوں میں فعال طرز زندگی کی حوصلہ افزائی کے لیے 12 سال سے کم عمر بچوں کیلئے بھی ریس کا اہتمام کیا جائے گا۔ ایونٹ کو دلچسپ اور ناقابل فراموش بنانے کے لیے کھانے کے اسٹالز اور گیمز کی ایک وسیع رینج کا اہتمام بھی کیا جائےگا۔
