پاکستان نے غزہ کے بیپٹسٹ اسپتال پر اسرائیل کے تازہ فضائی حملے کی سخت الفاظ میں مذمت کرتے ہوئے اسے "انسانیت سوز جرم” قرار دیا ہے اور عالمی برادری سے فوری اقدام کی اپیل کی ہے۔
ترجمان دفتر خارجہ نے ایک بیان میں کہا کہ اسپتال پر حملہ، جہاں معصوم مریض اور طبی عملہ موجود تھا، بین الاقوامی انسانی قوانین کی کھلی خلاف ورزی ہے۔ انہوں نے زور دیا کہ ایسے واقعات عالمی ضمیر کو جھنجھوڑنے کے لیے کافی ہیں اور فوری جنگ بندی کے بغیر صورتحال مزید بگڑ سکتی ہے۔
عالمی برادری سے مطالبہ
پاکستان نے اقوام متحدہ، اسلامی تعاون تنظیم (OIC) اور دیگر عالمی اداروں سے مطالبہ کیا ہے کہ وہ غزہ میں انسانی جانوں کے تحفظ کو یقینی بنائیں,فوری جنگ بندی کے لیے دباؤ ڈالیں,اسرائیلی جارحیت کا نوٹس لیتے ہوئے سخت اقدامات کریں
اسرائیلی فضائی حملے میں بیپٹسٹ اسپتال کو نشانہ بنایا گیا، جس کے نتیجے میں درجنوں شہری شہید اور زخمی ہوئے، جن میں بچے، خواتین اور طبی عملہ بھی شامل ہیں۔ حملے کے وقت اسپتال میں زخمیوں کا علاج جاری تھا، جس نے اس واقعے کو اور بھی المناک بنا دیا۔
پاکستان کا مؤقف
پاکستان نے ایک بار پھر اپنے دیرینہ مؤقف کا اعادہ کیا کہ "فلسطینی عوام کو ان کا حق خود ارادیت اور ایک خودمختار ریاست کا حق حاصل ہے، جس کا دارالحکومت القدس الشریف ہو۔”اسلام آباد نے زور دیا کہ اگر عالمی برادری خاموش رہی، تو اس سے انسانی المیے میں اضافہ اور مشرق وسطیٰ میں امن و استحکام کے لیے خطرات بڑھ سکتے ہیں۔
About The Author
