پاکستان کے وزیر دفاع خواجہ آصف نے کہا ہے کہ بھارت کے ڈرون حملوں کے بعد پاکستان ہر صورت اس کو جواب دے گا۔ کوئی کسی غلط فہمی میں نہ رہے۔
غیر ملکی میڈیا کو انٹرویو دیتے ہوئے خواجہ آصف نے کہا امریکا کی قیادت میں پاکستان اور بھارت کے درمیان کشیدگی کم کرنے کے لیے عالمی کوششیں ہورہی ہیں، وزیردفاع نے بھارتی ڈرون حملوں سے کسی بھی عسکری تنصیبات کو نقصان پہنچنے کے دعووں کو بھی مسترد کر دیا ۔
وزیر دفاع کا کہنا تھا امریکا، بھارت اور پاکستان کے درمیان کشیدگی کم کرنے کے لیے عالمی کوششوں کی قیادت کر رہا ہے۔
وزیردفاع نے کہا کہ بھارت کی جانب سے پاکستانی حدود میں ڈرون کی دراندازیوں کے بعد بھارت کو جواب دینا یقینی ہوگیا ہے۔
پاکستان کے وزیر دفاع خواجہ آصف نے مزید کہا کہ کشیدگی کم کرنے کے لیے بمشکل کوئی گنجائش باقی رہ گئی ہےکیونکہ اب یہ لڑائی ایک بند گلی میں داخل ہورہی ہے۔
وزیردفاع نے کہا کہ پاکستان جوابی کارروائی میں بھارت کی فوجی تنصیبات کو نشانہ بنائے گا۔
خواجہ آصف نے آج ہونے والے بھارتی ڈرون حملوں میں کسی بھی فوجی تنصیبات کو نقصان پہنچنے کے دعووں کو مسترد کر دیا۔
انہوں نے کہا کہ لاہور میں کسی بھی فوجی تنصیبات یا فضائی دفاعی نظام کو بھارتی ڈرونز سے نقصان نہیں پہنچا۔
قبل ازیں بھارتی حکومت نے دعویٰ کیا تھا کہ اس کی فوج نے پاکستان میں متعدد مقامات پر فضائی دفاعی ریڈار اور نظاموں کو نشانہ بنا کر نقصان پہنچایا ہے۔
