امریکی صدر ڈونلڈ ٹرمپ نے ملک کی قومی سلامتی کو نئی بلندیوں پر لے جانے کے لیے ایک نیا اور مہنگا ترین دفاعی پروگرام متعارف کروا دیا ہے، جسے "گولڈن ڈوم میزائل ڈیفنس سسٹم” کا نام دیا گیا ہے۔ یہ منصوبہ امریکہ کو زمین اور خلا سے ممکنہ میزائل حملوں سے بچانے کے لیے تیار کیا جا رہا ہے، جس کی کل متوقع لاگت 540 ارب ڈالر سے تجاوز کر سکتی ہے۔
ٹرمپ نے اوول آفس میں ایک پریس بریفنگ کے دوران، وزیر دفاع پیٹ ہیگستھ کے ہمراہ، منصوبے کی ابتدائی 25 ارب ڈالر کی فنڈنگ کے آغاز کا اعلان کیا، جو ریپبلکنز کی زیرقیادت کانگریس سے منظور شدہ ہے۔
نظام کی قیادت کے لیے ٹرمپ نے امریکی خلائی فورس کے جنرل مائیکل گوٹلین کو منتخب کیا ہے، جو میزائل دفاع، خلائی آپریشنز اور جدید دفاعی حکمت عملیوں میں مہارت رکھتے ہیں۔ جنرل گوٹلین اس وقت خلائی فورس میں نائب سربراہ برائے آپریشنز کے طور پر خدمات انجام دے رہے ہیں۔
بین الاقوامی وسعت کا عندیہ
صدر ٹرمپ نے اس بات کی بھی تصدیق کی کہ کینیڈا نے اس پروگرام میں شامل ہونے کی دلچسپی ظاہر کی ہے، جس سے اس منصوبے کے ممکنہ بین الاقوامی کردار اور امریکی سرحدوں سے باہر اس کی توسیع کا اشارہ ملتا ہے۔
‘گولڈن ڈوم’ کا مشن
ٹرمپ نے اعلان کرتے ہوئے کہا”ایک بار مکمل ہونے پر، ’گولڈن ڈوم‘ زمین یا خلا سے داغے گئے کسی بھی میزائل کو روکنے کی صلاحیت رکھے گا۔ یہ امریکی سرزمین کو لاحق خطرات کو ہمیشہ کے لیے ختم کر دے گا۔”
اگرچہ ٹرمپ نے ابتدائی لاگت کو 175 ارب ڈالر کے قریب بتایا، لیکن کانگریس کے بجٹ آفس کا اندازہ ہے کہ منصوبہ آئندہ بیس برسوں میں 540 ارب ڈالر سے تجاوز کر جائے گا۔
ٹیکنالوجی، شراکت داری اور دفاعی صنعت
ماہرین کے مطابق، جنرل گوٹلین کی قیادت میں نجی دفاعی کمپنیوں کے ساتھ جدید ٹیکنالوجی کی شراکت داری کو تیز کیا جائے گا۔ پروگرام کا مقصد ایسا جامع دفاعی نظام تیار کرنا ہے جو امریکہ کو نہ صرف موجودہ بلکہ مستقبل کے بالخصوص خلا سے لاحق خطرات سے محفوظ رکھ سکے۔
About The Author
