تجارت، توانائی، علاقائی سلامتی اور موسمیاتی تعاون پر اہم پیش رفت
وزیراعظم محمد شہباز شریف نے تاجکستان کا دو روزہ سرکاری اور تاریخی دورہ کامیابی سے مکمل کر لیا، جس کے دوران دونوں ممالک نے دوطرفہ تعاون کے مختلف شعبوں میں اہم پیش رفت اور معاہدوں پر بات چیت کی۔ وزیراعظم جمعہ کے روز دوشنبہ سے وطن واپس روانہ ہو گئے، جہاں تاجک نائب وزیراعظم حکیم خلیق زودہ نے انہیں رخصت کیا۔
وزیراعظم کے ہمراہ وفاقی وزیر اطلاعات عطا اللہ تارڑ اور وزیراعظم کے معاون خصوصی سید طارق فاطمی بھی وفد میں شامل تھے۔
وزیراعظم شہباز شریف نے اپنے قیام کے دوران تاجکستان کے صدر امام علی رحمان سے تفصیلی ملاقات کی، جس میں تجارت، توانائی، بنیادی ڈھانچے کی ترقی، علاقائی رابطہ کاری اور سلامتی تعاون کے فروغ پر تبادلہ خیال کیا گیا۔ دونوں رہنماؤں نے تعلقات کو نئی بلندیوں تک لے جانے کے عزم کا اعادہ کیا۔
اس دورے کا ایک اہم پہلو دوشنبہ میں گلیشیئر کے تحفظ سے متعلق بین الاقوامی کانفرنس میں وزیراعظم کا خطاب تھا۔ انہوں نے پاکستان میں موسمیاتی تبدیلیوں کے خطرناک اثرات پر روشنی ڈالی، خصوصاً شمالی علاقوں میں گلیشیئرز کے تیزی سے پگھلنے کے تناظر میں۔
وزیراعظم نے دنیا کو خبردار کیا کہ اگر بروقت اور اجتماعی اقدام نہ کیا گیا تو پانی کی قلت اور ماحولیاتی عدم استحکام لاکھوں زندگیاں متاثر کر سکتے ہیں۔ انہوں نے پاکستان کے ماحولیاتی وژن اور بین الاقوامی موسمیاتی تعاون کے عزم کا اعادہ کیا۔
یہ دورہ وسطی ایشیا میں پاکستان کی سفارتی حکمت عملی کا حصہ ہے جس کا مقصد نہ صرف دوطرفہ معاشی تعلقات کو فروغ دینا ہے بلکہ علاقائی ترقی، استحکام اور پائیدار ماحولیاتی نظم میں پاکستان کا کردار مستحکم کرنا بھی ہے۔
تجزیہ کاروں کے مطابق، اس دورے کو نہ صرف سفارتی کامیابی قرار دیا جا رہا ہے بلکہ یہ پاکستان-تاجکستان تعلقات کو ایک نئی جہت دینے میں بھی مددگار ثابت ہوگا۔
About The Author
