نئی دہلی: بھارتی خفیہ ایجنسی ’’را‘‘ کے سابق سربراہ امرجیت سنگھ دولت (A.S. DULAT) نے پہلگام حملے کو بھارت کی انٹیلیجنس اور سیکیورٹی کی مکمل ناکامی قرار دیا ہے۔
اے ایس دولت کا کہنا ہے کہ "پہلگام میں جو ہوا، وہ واقعی بہت برا تھا، اور اس میں بھارت کی انٹیلیجنس کی مکمل ناکامی ہے”۔ اُنہوں نے تسلیم کیا کہ حملے کے حوالے سے بھارت کے پاس کوئی واضح شواہد موجود نہیں تھے، اور کئی مواقع پر بھارت بغیر ثبوت کے الزامات لگا دیتا ہے۔
اے ایس دولت نے اعتراف کیا کہ بھارت میں ہونے والے بیشتر واقعات کا الزام فوری طور پر پاکستان پر ڈال دینا معمول بن چکا ہے، چاہے اس کے کوئی شواہد موجود ہوں یا نہیں۔ اُنہوں نے مودی سرکار کی پاکستان مخالف بیانیے پر مبنی عوامی ذہن سازی پر بھی سوالات اٹھائے۔
دولت نے مزید کہا کہ پاکستان نے بھارت کے چھ جہاز مار گرائے تھے، جو کہ حقیقت ہے لیکن بھارتی بیانیے میں اس کا اعتراف نہیں کیا جاتا۔ کشمیر سے متعلق سوال پر انہوں نے کہا کہ "کشمیر میں حالات کو بہتر بنانے کے لیے پاکستان کو ایک ذمہ دار فریق کے طور پر سنجیدگی سے لینا ہو گا”۔
ایران اور اسرائیل کے درمیان حالیہ کشیدگی پر تبصرہ کرتے ہوئے دولت نے کہا کہ فیلڈ مارشل سید عاصم منیر اس تنازع میں امن اور ثالثی کے لیے ایک مؤثر کردار ادا کر سکتے ہیں، اور پاکستان کے خطے میں استحکام کے لیے اقدامات قابل تعریف ہیں۔
About The Author
