اقوام متحدہ میں پاکستان کے مستقل مندوب عاصم افتخار احمد نے کہا ہے پاکستان اسرائیل کی ایران پر بلاجواز حملوں اور جارحیت کی سخت الفاظ میں مذمت کرتا ہے۔
پاکستان ایران کے عوام کے ساتھ مضبوط یکجہتی کا اظہار کرتا ہے۔ پاکستان اسرائیل کے کھلے عام حملوں اور فوجی کارروائیوں کی دو ٹوک مذمت کرتا ہے جو پورے خطے بلکہ اس سے باہر بھی امن، سلامتی اور استحکام کیلئے سنگین خطرہ ہے۔
پاکستان ان بلااشتعال حملوں کے نتیجے میں قیمتی جانوں کے ضیاع پر ایرانی عوام سے دلی تعزیت اور ہمدردی کا اظہار کرتا ہے۔ دونوں جانب انسانی بحران اور عام شہریوں کی ہلاکتیں انتہائی قابل افسوس ہیں۔
عاصم افتخار نے بتایا کہ گذشتہ جمعے کو اسرائیلی حملوں کے بعد سلامتی کونسل کا ہنگامی اجلاس طلب کیا گیا تھا اور ایک ہفتے بعد اسرائیل کے ’غیر ذمہ دارانہ رویے‘ کے سبب صورت حال مزید بگڑ چکی ہے جس کے علاقائی اور بین الاقوامی امن پر سنگین مضمرات ہیں۔
عاصم افتخار نے زور دیا کہ بین الاقوامی انسانی قانون کی تمام فریقین کو مکمل پاسداری کرنی چاہیے۔ انہوں نے خصوصی تشویش کا اظہار کرتے ہوئے کہا کہ جوہری تنصیبات پر حملے انتہائی پریشان کن ہیں۔
ان کا کہنا تھا کہ ایسے حملے بین الاقوامی قانون، اقوام متحدہ کے چارٹر، بین الاقوامی ایجنسی برائے جوہری توانائی (آئی اے ای اے) کے آئین اور متعلقہ قراردادوں کی خلاف ورزی ہیں۔
