لاہور – انٹرنیشنل کرکٹ کونسل (آئی سی سی) ٹیسٹ چیمپئن شپ کے چوتھے سائیکل (2025–27) کے سلسلے میں پاکستان کرکٹ ٹیم شان مسعود کی قیادت میں دو ٹیسٹ میچوں کی سیریز کے لیے میدان میں اترنے کو تیار ہے۔
قذافی اسٹیڈیم لاہور میں اتوار سے شروع ہونے والے پہلے ٹیسٹ میں پاکستان نے 7 بیٹرز، 2 فاسٹ بولرز اور 2 اسپنرز پر مشتمل ٹیم کومیدان میں اتارنے کا فیصلہ کیا ہے۔
پی سی بی ذرائع کے مطابق، دائیں ہاتھ کے اسپنر ساجد خان وائرل بخار کے باعث ٹیم سے باہر ہوگئے ہیں، جن کی جگہ بائیں ہاتھ کے اسپنر آصف آفریدی کو موقع دیا گیا ہے۔
38 سالہ آصف آفریدی اب تک 57 فرسٹ کلاس میچز میں 198 وکٹیں حاصل کر چکے ہیں۔ ان کے ہمراہ تجربہ کار اسپنر نعمان علی ہوں گے، جنہوں نے 19 ٹیسٹ میچوں میں 83 وکٹیں اپنے نام کی ہیں۔
فاسٹ بولنگ یونٹ میں شاہین شاہ آفریدی ایک سال بعد ٹیم میں واپسی کر رہے ہیں۔ 31 ٹیسٹ میچز میں 116 وکٹیں لینے والے یہ بائیں ہاتھ کے فاسٹ بولر، حسن علی کے ساتھ نئی گیند سے حملہ آور ہوں گے۔ حسن علی نے اب تک 24 ٹیسٹ میں 80 وکٹیں حاصل کی ہیں، اور انہوں نے اپنا آخری ٹیسٹ جنوری 2024 میں آسٹریلیا کے خلاف سڈنی میں کھیلا تھا۔
پاکستان ٹیم کی اننگز کا آغاز امام الحق اور عبداللّٰہ شفیق کریں گے، جبکہ مڈل آرڈر میں کپتان شان مسعود، سابق کپتان بابر اعظم، سعود شکیل اور محمد رضوان شامل ہیں، جو وکٹ کیپنگ کے فرائض بھی انجام دیں گے۔
آل راؤنڈر سلمان علی آغا کو بھی اسکواڈ کا حصہ بنایا گیا ہے تاکہ ٹیم بیلنس برقرار رہے۔
پہلے ٹیسٹ کے لیے پاکستان کے 11 کھلاڑیوں کی فہرست:
-
امام الحق
-
عبداللّٰہ شفیق
-
شان مسعود (کپتان)
-
بابر اعظم
-
سعود شکیل
-
محمد رضوان (وکٹ کیپر)
-
سلمان علی آغا
-
شاہین شاہ آفریدی
-
حسن علی
-
نعمان علی
-
آصف آفریدی
