لندن: پاکستان تحریکِ انصاف کے بانی اور سابق وزیراعظم عمران خان کی سابق خوشدامن اور برطانوی سماجی شخصیت لیڈی اینابیل گولڈ سمتھ طویل علالت کے بعد 91 برس کی عمر میں لندن میں انتقال کر گئیں۔
برطانوی نشریاتی ادارے کے مطابق، لیڈی اینابیل گولڈ سمتھ 11 جون 1934 کو لندن میں پیدا ہوئیں۔ ان کے چھ بچے تھے جن میں معروف فلم پروڈیوسر جمائما گولڈ سمتھ اور برطانیہ کے سابق رکن پارلیمان و سیاستدان زیک گولڈ سمتھ شامل ہیں۔
لیڈی اینابیل کی زندگی کئی نشیب و فراز سے بھری رہی۔ ان کے ایک بیٹے کا انتقال مغربی افریقہ میں ہوا جبکہ دوسرا بیٹا شیر کے حملے میں جاں بحق ہوا۔ ان کے شوہر سر جیمز گولڈ سمتھ نے اپنی اہلیہ کے اعزاز میں لندن کے مشہور مے فئیر نائٹ کلب کا نام “Annabel’s” رکھا، جو برطانوی اشرافیہ اور شاہی خاندان کی شخصیات کا پسندیدہ مقام رہا۔
صرف 15 سال کی عمر میں انہیں "لیڈی اینابیل” کا خطاب دیا گیا۔ ان کی پہلی شادی مارک برلے سے 21 سال تک قائم رہی، جس کے بعد انہوں نے 1978 میں سر جیمز گولڈ سمتھ سے دوسری شادی کی۔
ان کے بیٹے زیک گولڈ سمتھ کو بعد ازاں لارڈ کے خطاب سے نوازا گیا اور انہوں نے 2016 میں میئر لندن کے انتخابات میں صادق خان کے خلاف الیکشن لڑا۔
یاد رہے کہ لیڈی اینابیل کی بیٹی جمائما گولڈ سمتھ نے 1995 میں عمران خان سے شادی کی تھی، تاہم دونوں کے درمیان 2004 میں علیحدگی ہو گئی تھی۔
لیڈی اینابیل کے انتقال پر برطانوی اشرافیہ اور سیاسی حلقوں نے گہرے دکھ اور افسوس کا اظہار کیا ہے۔
