ہانگ کانگ: طیارہ حادثے کی تحقیقات میں اہم پیشرفت، بلیک باکسز برآمد

رپورٹس کے مطابق، یہ حادثہ پیر کی علی الصبح پیش آیا جب طیارہ لینڈنگ کے دوران رن وے سے پھسل کر ایک حفاظتی گشتی گاڑی سے ٹکرا گیا اور پھر سمندر میں جا گرا۔

یہ واقعہ 1998 میں ہانگ کانگ ایئرپورٹ کے آغاز کے بعد سب سے سنگین حادثہ قرار دیا جا رہا ہے۔ افسوسناک طور پر اس میں دو سیکیورٹی اہلکار ہلاک ہوئے، جن کے بارے میں حکام کا کہنا ہے کہ وہ اُس وقت “رن وے ایریا سے باہر محفوظ مقام” پر موجود تھے۔

ایئرپورٹ اتھارٹی ہانگ کانگ کے مطابق، حادثے کے مقام سے ایک انجن، لینڈنگ گیئر، اور دونوں ڈیٹا ریکارڈرز کامیابی سے برآمد کر لیے گئے ہیں۔

شہر کے ٹرانسپورٹ اور لاجسٹکس بیورو نے اعلان کیا ہے کہ ابتدائی تحقیقاتی رپورٹ ایک ماہ کے اندر جاری کی جائے گی، جب کہ مکمل رپورٹ بعد میں منظر عام پر آئے گی۔

تحقیقات میں امریکی اور ترک شہری ہوا بازی کی ایجنسیاں اور بوئنگ کمپنی کے ماہرین بھی شامل ہیں، جو حادثے کی وجوہات جاننے کے لیے تکنیکی معاونت فراہم کر رہے ہیں۔

ایمریٹس ایئرلائنز کے مطابق، حادثے کا شکار طیارہ ترک ایئرلائن "ایکٹ ایئرلائنز” سے عارضی لیز پر حاصل کیا گیا تھا اور وہی اسے چلا رہی تھی۔