واشنگٹن – امریکی صدر ڈونلڈ ٹرمپ نے بھارت کے ساتھ نئی تجارتی ڈیل کا اعلان کر دیا ہے، جسے وہ ماضی کے معاہدوں سے "بہت مختلف” قرار دے رہے ہیں۔
وائٹ ہاؤس میں تقریب سے خطاب کرتے ہوئے صدر ٹرمپ نے کہا کہ امریکا اور بھارت تجارتی معاہدے کے انتہائی قریب ہیں۔ ان کا کہنا تھا کہ "بھارتی وزیراعظم نریندر مودی سے ہماری بہترین شراکت داری ہے، بھارت روس سے تیل کی خریداری مرحلہ وار ختم کر رہا ہے، جبکہ میں ٹیرف میں نمایاں کمی لانے والا ہوں۔”
امریکی صدر نے مزاحیہ انداز میں کہا کہ "بھارت اس وقت مجھے پسند نہیں کرتا، مگر جلد ہی وہ دوبارہ مجھے پسند کرنے لگے گا۔”
صدر ٹرمپ نے مزید بتایا کہ سرجیو گور کو بھارت کے لیے امریکی سفیر تعینات کر دیا گیا ہے اور انہوں نے اپنے عہدے کا باقاعدہ حلف اٹھا لیا ہے۔
بین الاقوامی امور پر بات کرتے ہوئے صدر ٹرمپ نے کہا کہ "شام کے صدر کے ترکی کے صدر اردگان کے ساتھ اچھے تعلقات ہیں، ہم اسرائیل کے ساتھ مل کر شام کے ساتھ تعلقات بہتر بنانے پر کام کر رہے ہیں۔”
امریکی شٹ ڈاؤن کے حوالے سے بات کرتے ہوئے صدر ٹرمپ نے دعویٰ کیا کہ انہیں ڈیموکریٹس کی حمایت حاصل ہے اور جلد شٹ ڈاؤن ختم ہو جائے گا۔
