امریکی صدر ڈونلڈ ٹرمپ نے اسرائیل کو خبردار کیا ہے کہ وہ شام اور اس کی نئی قیادت کو غیر مستحکم کرنے سے گریز کرے۔ ان کا یہ بیان جنوبی شام میں اسرائیلی فورسز کی کارروائی میں 13 افراد کی ہلاکت کے چند روز بعد سامنے آیا ہے۔
اپنے ٹروتھ سوشل پلیٹ فارم پر جاری پیغام میں صدر ٹرمپ نے کہا کہ اسرائیل کے لیے ضروری ہے کہ وہ شام کے ساتھ “مضبوط اور حقیقی بات چیت” برقرار رکھے اور ایسے اقدامات سے پرہیز کرے جو ایک “خوشحال شامی ریاست” کی ترقی میں رکاوٹ بنیں۔
ٹرمپ نے شام کے صدر احمد الشارع کی کارکردگی پر اطمینان کا اظہار کیا، جنہوں نے رواں سال نومبر میں وائٹ ہاؤس کا تاریخی دورہ کیا تھا۔ ان کے مطابق صدر شارع “بہتری اور استحکام کو یقینی بنانے کے لیے بھرپور محنت کر رہے ہیں اور شام و اسرائیل کے درمیان بہتر تعلقات کے خواہاں ہیں۔”
صدر ٹرمپ گزشتہ ایک سال سے اسرائیل اور شام کے درمیان سیکیورٹی معاہدے کے قیام پر زور دے رہے ہیں، جب سے شارع کی قیادت میں اپوزیشن اتحاد نے سابق صدر بشار الاسد کی حکومت کا تختہ الٹ دیا تھا۔ تاہم اسرائیل کی جانب سے شام میں سینکڑوں حملوں کے باعث خطے میں کشیدگی مسلسل بڑھ رہی ہے۔
جمعہ کے روز جنوبی شام میں اسرائیلی کارروائی سب سے مہلک حملوں میں شمار کی گئی، جس میں 13 افراد ہلاک ہوئے۔ اسرائیلی حکام کا کہنا تھا کہ کارروائی ایک مسلح گروپ کے خلاف کی گئی۔
صدر ٹرمپ نے کہا کہ امریکہ شام کی تعمیر نو میں بھرپور کردار ادا کر رہا ہے اور یقینی بنایا جائے گا کہ شامی حکومت اپنے وعدوں پر قائم رہے۔ ان کے مطابق شام اور اسرائیل کے بہتر تعلقات اکتوبر میں غزہ کی جنگ بندی کے بعد مشرق وسطیٰ میں وسیع تر امن کی کوششوں کو تقویت دے سکتے ہیں۔
