میلبرن – کرکٹ آسٹریلیا کے چیف ایگزیکٹو ٹوڈ گرین برگ نے بگ بیش لیگ (بی بی ایل) میں شامل پاکستانی کھلاڑیوں کے حوالے سے اہم بیان دیتے ہوئے کہا ہے کہ پاکستانی کھلاڑیوں کو بی بی ایل کا مکمل سیزن کھیلنے کی یقین دہانی کرا دی گئی ہے۔
ٹوڈ گرین برگ نے میڈیا سے گفتگو کرتے ہوئے بتایا کہ کرکٹ آسٹریلیا کو واضح طور پر آگاہ کیا گیا ہے کہ جن پاکستانی کھلاڑیوں کے بی بی ایل کے ساتھ معاہدے طے پا چکے ہیں، وہ پورے سیزن میں دستیاب رہیں گے۔ ان کا کہنا تھا کہ اس حوالے سے تمام فریقین کے درمیان مشاورت جاری ہے تاکہ کسی قسم کی ابہام کی صورتحال پیدا نہ ہو۔
انہوں نے پاکستان کے مجوزہ دورے پر بات کرتے ہوئے کہا کہ ٹی 20 سیریز کے لیے آسٹریلیا کا دورۂ پاکستان شیڈول کے مطابق ہوگا، تاہم سیریز کی حتمی تاریخوں کا اعلان جلد کیا جائے گا۔ ٹوڈ گرین برگ کے مطابق ایشیز سیریز کے اختتام کے بعد کھلاڑیوں سے دورۂ پاکستان سے متعلق تفصیلی بات چیت کی جائے گی۔
کرکٹ آسٹریلیا کے سی ای او نے سکیورٹی امور پر اعتماد کا اظہار کرتے ہوئے کہا کہ کھلاڑیوں کو سکیورٹی کے تمام انتظامات اور صورتحال سے مکمل طور پر آگاہ کیا جائے گا۔ انہوں نے یاد دلایا کہ وہ خود 2022 میں پاکستانی دورے پر ٹیم کے ساتھ جا چکے ہیں اور ان کے بقول یہ دورہ ایک انتہائی مثبت اور خوشگوار تجربہ رہا تھا۔
واضح رہے کہ اس سے قبل خدشہ ظاہر کیا جا رہا تھا کہ جنوری میں پاکستان کے سری لنکا کے دورے کی وجہ سے قومی ٹیم کے کھلاڑی بی بی ایل کا مکمل سیزن نہیں کھیل پائیں گے، تاہم کرکٹ آسٹریلیا کے حالیہ بیان کے بعد ان خدشات میں واضح کمی آئی ہے۔
کرکٹ ماہرین کے مطابق اگر پاکستانی کھلاڑی بی بی ایل کا پورا سیزن کھیلتے ہیں تو اس سے نہ صرف لیگ کا معیار بلند ہوگا بلکہ پاکستانی کھلاڑیوں کو بھی عالمی سطح پر اپنی صلاحیتیں مزید منوانے کا موقع ملے گا۔
About The Author
