ایرانی سپریم لیڈر آیت اللہ علی خامنہ ای نے سابق امریکی صدر ڈونلڈ ٹرمپ پر سخت تنقید کرتے ہوئے کہا ہے کہ جس طرح تاریخ میں فرعون، نمرود اور شاہِ ایران رضا پہلوی کا انجام عبرتناک ہوا، اسی طرح ٹرمپ کا بھی برا انجام ہوگا۔
آیت اللہ خامنہ ای نے کہا کہ جو حکمران دنیا پر غرور کے ساتھ فیصلے مسلط کرتے ہیں، تاریخ انہیں کبھی معاف نہیں کرتی اور ایسے افراد اپنے عروج کے وقت ہی زوال کی طرف بڑھنا شروع ہو جاتے ہیں۔ انہوں نے امریکی اقدامات کو خطے میں مداخلت اور وسائل، بالخصوص تیل پر قبضے کی کوششوں سے تعبیر کیا۔
انہوں نے لاطینی امریکا کے ایک ملک کا حوالہ دیتے ہوئے کہا کہ ٹرمپ انتظامیہ نے اس ملک کو اپنے اثر و رسوخ میں لے کر صرف تیل کے مفادات کے لیے براہِ راست کارروائیاں کیں۔ سپریم لیڈر نے 12 روزہ جنگ کا ذکر کرتے ہوئے دعویٰ کیا کہ اس دوران ایک ہزار سے زائد ایرانی شہری شہید ہوئے اور ان حملوں کے احکامات ٹرمپ نے خود دیے تھے۔
آیت اللہ خامنہ ای نے کہا کہ جو شخص ایرانی عوام کے قتل کا ذمہ دار ہو، وہ آج کس طرح خود کو ایرانی قوم کا حامی ظاہر کر سکتا ہے۔ انہوں نے ایران میں جاری مظاہروں کے تناظر میں مظاہرین کو فسادی قرار دیتے ہوئے عوام سے اتحاد اور استقامت برقرار رکھنے کی اپیل کی۔
سپریم لیڈر نے الزام لگایا کہ امریکا کو خوش کرنے کے لیے فسادی عناصر نے اپنی ہی سرکاری عمارتوں کو نقصان پہنچایا، تاہم ایران ایسے تخریب کاروں کے سامنے کبھی نہیں جھکے گا۔ انہوں نے مزید کہا کہ اسلامی جمہوریہ ایران سیکڑوں ہزار قربانیوں کے بعد قائم ہوئی ہے اور دشمنی و دباؤ کے باوجود اپنے مؤقف پر ثابت قدم رہے گی۔
About The Author
