رائل سعودی ایئر فورس کی قیادت میں سپیئرز آف وکٹری 2026 کے عنوان سے مشترکہ فوجی مشقیں اتوار کو مشرقی ریجن کے ایئر وارفیئر سینٹر میں شروع ہو رہی ہیں۔ یہ مشقیں 18 جنوری سے 5 فروری تک جاری رہیں گی، جن میں علاقائی اور بین الاقوامی سطح پر وسیع شرکت متوقع ہے۔
مشقوں میں سعودی عرب کی مسلح افواج، وزارت نیشنل گارڈ، پریزیڈنسی آف اسٹیٹ سیکیورٹی، خلیج تعاون کونسل کی یونیفائیڈ ملٹری کمانڈ اور متعدد دوست ممالک کے فوجی دستے حصہ لیں گے۔ اس کا مقصد فوجی تعاون کو فروغ دینا اور مشترکہ آپریشنل انضمام کو مضبوط بنانا ہے۔
سپیئرز آف وکٹری 2026 کے دوران جنگی تیاریوں میں اضافہ، منصوبہ بندی اور عمل درآمد میں مہارت کے تبادلے، اور شریک افواج کے درمیان مشترکہ فوجی کارروائی کے تصور کو ہم آہنگ کرنے پر توجہ دی جائے گی۔ مشقوں میں موجودہ اور ابھرتے ہوئے سیکیورٹی خطرات سے نمٹنے، حکمت عملی کی صلاحیتوں کو بہتر بنانے اور مشترکہ آپریشنل حکمت عملیوں کو فروغ دینے کے پہلو شامل ہوں گے۔
شرکت کرنے والی افواج جدید الیکٹرونک جنگی ماحول میں ملٹی ڈومین مشترکہ فضائی کارروائیوں کے تصورات کو عملی جامہ پہنانے کے لیے مختلف مشترکہ اور ہم آہنگ حکمت عملی کی کارروائیاں انجام دیں گی۔
ایئر وارفیئر سینٹر کو خطے کی جدید ترین تربیتی سہولیات میں شمار کیا جاتا ہے، جہاں ایسا تربیتی ماحول فراہم کیا جاتا ہے جو حقیقی آپریشنل حالات کی عکاسی کرتا ہے اور جنگی صلاحیتوں کی تیاری اور جانچ میں معاون ثابت ہوتا ہے۔
About The Author
