ہرارے — انڈر 19 کرکٹ ورلڈ کپ میں پاکستان ٹیم آج اپنا آخری اور فیصلہ کن گروپ میچ زمبابوے کے خلاف کھیلے گی، جہاں کامیابی کی صورت میں قومی جونیئر ٹیم اگلے مرحلے میں جگہ بنا سکے گی۔
یہ اہم مقابلہ زمبابوے کے دارالحکومت ہرارے میں شیڈول ہے جو پاکستانی وقت کے مطابق دوپہر ساڑھے بارہ بجے شروع ہوگا۔ گروپ مرحلے کے اس آخری میچ میں شکست کی صورت میں پاکستان کا ٹورنامنٹ میں آگے بڑھنا مشکل ہو جائے گا، اسی لیے ٹیم کے لیے یہ میچ ’’ڈو اور ڈائی‘‘ کی حیثیت رکھتا ہے۔
پاکستانی ٹیم نے میچ سے قبل ہرارے میں بھرپور ٹریننگ سیشن میں حصہ لیا، جس میں کوچنگ اسٹاف کی زیر نگرانی کھلاڑیوں نے بیٹنگ، بولنگ اور فیلڈنگ کی خامیوں کو دور کرنے پر خصوصی توجہ دی۔ ٹیم مینجمنٹ کا کہنا ہے کہ گزشتہ میچ میں سامنے آنے والی کمزوریوں پر تفصیلی کام کیا گیا ہے تاکہ زمبابوے کے خلاف بہتر کارکردگی پیش کی جا سکے۔
گروپ مرحلے میں پاکستان ٹیم اب تک دو میچ کھیل چکی ہے، جن میں سے ایک میں کامیابی جبکہ ایک میں شکست کا سامنا کرنا پڑا۔ پوائنٹس ٹیبل پر بہتر پوزیشن کے لیے آج کا میچ جیتنا ناگزیر قرار دیا جا رہا ہے۔
دوسری جانب میزبان زمبابوے کی ٹیم بھی اپنے ہوم کنڈیشنز سے فائدہ اٹھانے کی کوشش کرے گی، تاہم پاکستانی کھلاڑی پرعزم ہیں کہ وہ دباؤ میں بہتر کھیل کا مظاہرہ کرتے ہوئے اگلے مرحلے کے لیے کوالیفائی کریں گے۔
ٹیم مینجمنٹ کے مطابق نوجوان کھلاڑیوں کو اعتماد دلایا گیا ہے کہ وہ بغیر کسی دباؤ کے اپنی صلاحیتوں کے مطابق کھیلیں، کیونکہ یہی میچ پاکستان کے انڈر 19 ورلڈ کپ کے سفر کا فیصلہ کرے گا۔
About The Author
