بھارتی فضائیہ (IAF) نے تصدیق کی ہے کہ اس کا ایک سخوئی Su-30MKI جنگی طیارہ شمال مشرقی ریاست آسام میں تربیتی مشن کے دوران گر کر تباہ ہو گیا، جس میں سوار دونوں پائلٹ ہلاک ہو گئے۔
طیارہ جمعرات کی شام مقامی وقت کے مطابق 7 بج کر 42 منٹ پر جورہاٹ ایئر بیس سے روانہ ہوا تھا، تاہم بعد میں اس کا رابطہ منقطع ہو گیا۔ بعد ازاں تصدیق ہوئی کہ یہ کاربی آنگلونگ کے علاقے میں، جورہاٹ سے تقریباً 60 کلومیٹر دور گر کر تباہ ہوا۔
بھارتی فضائیہ نے ایکس (سابقہ ٹوئٹر) پر بتایا کہ حادثے کے فوراً بعد تلاش اور ریسکیو آپریشن شروع کر دیا گیا ہے اور مزید تفصیلات اکٹھی کی جا رہی ہیں۔
یہ حادثہ حالیہ عرصے میں بھارتی فضائیہ کے کئی ہائی ٹیک جنگی طیاروں کے حادثات کے سلسلے میں شامل ہے۔ تقریباً 10 روز قبل بھی تیجس لائٹ کومبیٹ ایئرکرافٹ ایک فضائی اڈے پر لینڈنگ کے دوران رن وے سے پھسل کر شدید نقصان کا شکار ہوا تھا، جبکہ گزشتہ سال نومبر میں دبئی ایئر شو کے دوران ایک تیجس طیارہ مظاہرے کے دوران گر کر تباہ ہوا تھا۔
سخوئی Su-30MKI دو انجنوں والا ملٹی رول جنگی طیارہ ہے، جسے روسی کمپنی نے تیار کیا ہے۔ اس میں بھارتی، فرانسیسی اور اسرائیلی ایویونکس اور ہتھیاروں کے نظام نصب ہیں۔ اسے 2000ء کی دہائی کے اوائل میں بھارتی فضائیہ میں شامل کیا گیا اور یہ فضائیہ کے سب سے طاقتور فرنٹ لائن طیاروں میں شمار ہوتا ہے۔
About The Author
