چین کے شہر ثانیہ میں جاری ایشین بیچ گیمز میں پاکستان کے لیے بڑی کامیابیاں سامنے آئی ہیں، جہاں قومی اسپرنٹرز فائقہ ریاض اور سمیع اللّٰہ نے 60 میٹر ریس کے فائنلز کے لیے کوالیفائی کر لیا ہے۔
ویمنز 60 میٹر ریس کی تیسری ہیٹ میں فائقہ ریاض نے عمدہ کارکردگی کا مظاہرہ کرتے ہوئے دوسری پوزیشن حاصل کی اور فائنل میں جگہ بنائی۔ تاہم اسی ایونٹ میں پاکستان کی ایک اور اسپرنٹر تامین خان فائنل کے لیے کوالیفائی نہ کر سکیں۔
دوسری جانب مینز 60 میٹر ریس کی پہلی ہیٹ میں سمیع اللّٰہ نے بھی شاندار دوڑ لگاتے ہوئے دوسری پوزیشن حاصل کی، جس کے باعث وہ بھی فائنل مرحلے تک رسائی حاصل کرنے میں کامیاب رہے۔ دونوں کھلاڑیوں کی یہ کامیابی پاکستان کے لیے میڈل کی امیدوں کو روشن کر رہی ہے۔
اسی دوران کبڈی ایونٹ میں بھی پاکستان نے زبردست کارکردگی دکھاتے ہوئے بنگلہ دیش کو 30 کے مقابلے 43 پوائنٹس سے شکست دے دی۔ اس کامیابی کے ساتھ قومی ٹیم نے ایونٹ میں اپنی پوزیشن مزید مستحکم کر لی ہے۔
ایشین بیچ گیمز میں پاکستانی کھلاڑیوں کی یہ مجموعی کارکردگی اس بات کی عکاسی کرتی ہے کہ ملک مختلف کھیلوں میں اپنی موجودگی کا بھرپور اظہار کر رہا ہے، اور آئندہ مراحل میں مزید کامیابیوں کی توقع کی جا رہی ہے۔
About The Author
