ایرانی آئل ٹینکر امریکی جہازوں کو چکمہ دے کرمشرق بعید پہنچ گیا، بحری حلقوں میں تشویش -

ایران کا ایک بڑا آئل ٹینکر مبینہ طور پر امریکی بحری نگرانی اور ٹریکنگ سسٹمز کو چکمہ دیتے ہوئے بحفاظت مشرق بعید کے سمندری علاقوں تک پہنچ گیا ہے، جس پر عالمی بحری و توانائی حلقوں میں تشویش پائی جا رہی ہے۔

میرین مانیٹرنگ رپورٹس کے مطابق National Iranian Tanker Company کا ویری لارج کروڈ کیریئر (VLCC) "HUGE” (IMO: 9357183) ایک ہفتہ قبل Sri Lanka کے قریب آخری بار دیکھا گیا تھا، جس کے بعد اس کی نقل و حرکت خفیہ ہو گئی تھی۔

رپورٹس میں بتایا گیا ہے کہ مذکورہ ٹینکر اس وقت Lombok Strait سے گزرتے ہوئے Riau Islands کی جانب بڑھ رہا ہے، جو عالمی بحری تجارت کے اہم راستوں میں شمار ہوتے ہیں۔

ذرائع کے مطابق جہاز پر تقریباً 19 لاکھ بیرل خام تیل موجود ہے، جس کی مالیت لگ بھگ 22 کروڑ ڈالر بتائی جا رہی ہے۔ یہ مقدار عالمی منڈی میں خاصی اہمیت رکھتی ہے، خصوصاً ایسے وقت میں جب ایران پر عائد پابندیوں کے باعث اس کی تیل برآمدات مسلسل نگرانی میں رہتی ہیں۔

ماہرین کا کہنا ہے کہ ٹینکر کی جانب سے ٹریکنگ سسٹمز سے بچنے کے لیے ممکنہ طور پر جدید تکنیکی طریقے استعمال کیے گئے، جیسے کہ آٹومیٹک آئیڈنٹیفیکیشن سسٹم (AIS) کو عارضی طور پر بند کرنا یا روٹ میں غیر متوقع تبدیلیاں، جس کے باعث اس کی درست لوکیشن کچھ عرصے تک معلوم نہ ہو سکی۔