وسطی چین کے صوبہ ہینان میں آتش بازی کے ایک بڑے کارخانے میں ہونے والے زوردار دھماکے نے تباہی مچا دی، جس کے نتیجے میں کم از کم 26 افراد ہلاک جبکہ 61 زخمی ہو گئے۔
چینی سرکاری خبر رساں ایجنسی ژنہوا کے مطابق دھماکا سہ پہر چانگشا کے قریب واقع ایک صنعتی پلانٹ میں پیش آیا۔ سرکاری میڈیا چائنا ڈیلی نے بتایا کہ یہ فیکٹری کاؤنٹی سطح کے شہر لیو یانگ میں واقع تھی، جو آتش بازی کی صنعت کے حوالے سے عالمی سطح پر ایک اہم مرکز سمجھا جاتا ہے۔
یہ پلانٹ ہواشینگ فائر ورکس مینوفیکچرنگ اینڈ ڈسپلے کمپنی کے زیرِ انتظام چلایا جا رہا تھا، جو اس شعبے میں ایک نمایاں نام ہے۔
شہر کے میئر چن بوزہنگ نے تصدیق کی کہ ریسکیو آپریشن بڑی حد تک مکمل کر لیا گیا ہے، تاہم جائے حادثہ پر اب بھی کچھ مقامات سے سفید دھواں اٹھ رہا ہے، جو ممکنہ طور پر مزید خطرات کی نشاندہی کرتا ہے۔ دھماکے کے باعث کئی عمارتیں مکمل طور پر تباہ یا زمین بوس ہو چکی ہیں۔
ابتدائی رپورٹس کے مطابق دھماکے کی وجہ فوری طور پر معلوم نہیں ہو سکی، تاہم ماہرین کا کہنا ہے کہ آتش بازی کے کارخانوں میں حفاظتی اقدامات کی معمولی کوتاہی بھی بڑے سانحے کا سبب بن سکتی ہے۔
حکام نے واقعے کی مکمل تحقیقات کا آغاز کر دیا ہے جبکہ زخمیوں کو قریبی اسپتالوں میں منتقل کر کے طبی امداد فراہم کی جا رہی ہے۔
About The Author
