پاکستان ائیر فورس نے 55ویں سینئر مینز نیشنل والی بال چیمپئن شپ 2026 کا ٹائٹل اپنے نام کر لیا۔ واہ کینٹ میں پاکستان آرڈیننس فیکٹری اسپورٹس کمپلیکس میں کھیلے گئے فائنل میں پاکستان ائیر فورس نے پاکستان نیوی کو دلچسپ مقابلے کے بعد ایک کے مقابلے میں تین سیٹ سے شکست دے دی۔
فائنل میچ میں دونوں ٹیموں نے اعلیٰ معیار کا کھیل پیش کیا تاہم پاکستان ائیر فورس نے اپنی مضبوط دفاعی حکمت عملی، مؤثر اسماشز اور بہترین ہم آہنگی کی بدولت فیصلہ کن برتری حاصل کی۔ پہلے سیٹ میں ائیر فورس نے جارحانہ آغاز کرتے ہوئے نیوی کو دباؤ میں رکھا اور کامیابی حاصل کی۔ دوسرے اور تیسرے سیٹ میں بھی دونوں ٹیموں کے درمیان سخت مقابلہ دیکھنے میں آیا لیکن ائیر فورس کے کھلاڑیوں نے اہم لمحات میں شاندار کارکردگی دکھاتے ہوئے میچ اپنے نام کر لیا۔
پاکستان نیوی نے کم بیک کی بھرپور کوشش کی اور کئی مواقع پر اسکور برابر بھی کیا، تاہم ائیر فورس کی ٹیم کی نفسیاتی برتری اور منظم کھیل کے باعث نیوی کامیابی حاصل نہ کر سکی۔
چیمپئن شپ میں پاکستان ائیر فورس کی کامیابی میں فہد اور رضا نے مرکزی کردار ادا کیا جنہوں نے جارحانہ اسماشز کے ذریعے نیوی کے دفاع کو مسلسل پریشان رکھا۔ آفاق خان اور عبدالرؤف نے نیٹ پر مؤثر بلاکنگ اور عمدہ پاسنگ سے ٹیم کی کامیابی میں اہم کردار ادا کیا۔
تیسری پوزیشن کے لیے کھیلے گئے میچ میں دفاعی چیمپئن واپڈا نے پاکستان آرمی کو شکست دے کر کانسی کا تمغہ حاصل کیا۔ واپڈا اس بار سیمی فائنل تک رسائی حاصل کرنے میں کامیاب ہوا تھا تاہم اسے پاکستان ائیر فورس کے ہاتھوں شکست کا سامنا کرنا پڑا۔
چیمپئن شپ میں ملک بھر سے سولہ ٹیموں نے شرکت کی جن میں صوبائی اور ادارہ جاتی ٹیمیں شامل تھیں۔ ایونٹ کے دوران شہریوں کی بڑی تعداد نے میچز دیکھے جبکہ خواتین اور بچوں کی بھی نمایاں شرکت رہی۔
ٹورنامنٹ کے سیمی فائنلز میں پاکستان ائیر فورس نے واپڈا جبکہ پاکستان نیوی نے پاکستان آرمی کو شکست دے کر فائنل میں جگہ بنائی تھی۔
About The Author
