پاکستان کی پیٹرولیم مصنوعات کا سالانہ درآمدی بل آئی ایم ایف تخمینے سے زیادہ -

اسلام آباد: مشرق وسطیٰ کشیدگی کے باعث عالمی منڈی میں تیل کی قیمتوں میں تاریخی اضافے نے پاکستان کی پیٹرولیم مصنوعات کا سالانہ درآمدی بل عالمی مالیاتی فنڈ (آئی ایم ایف) کے تخمینے سے زیادہ کردیا۔

مالی سال 26-2025 میں پاکستان کا آئل امپورٹ بل آئی ایم ایف کے تخمینے سے ایک ارب 58 کروڑ ڈالر اضافے کے بعد 16 ارب 86 کروڑ ڈالرپر پہنچ گیا۔

عالمی مالیاتی فنڈ نے رواں مالی سال 27-2026 کیلئے پاکستان کے آئل امپورٹ کا تخمینہ 16 ارب 31 کروڑ ڈالرز لگایا ہے، تاہم عالمی منڈی میں تیل کی قیمتوں میں تاریخی اضافے نے جہاں ایک طرف پاکستان کی پیٹرولیم مصنوعات کے درآمدی بل میں اضافہ کیا تو وہیں دوسری طرف پاکستانی شہری ملکی تاریخ کا سب سے زیادہ مہنگا پیٹرول اور ڈیزل خریدنے پر مجبور ہوئے۔

سرکاری دستاویزات اور آئی ایم ایف کی جانب سے پاکستان کے لیے تخمینہ جات سے معلوم ہوتا ہے کہ30 جون کو ختم ہونے والےمالی سال 26-2025 میں پاکستان کی تیل درآمدات 16 ارب 86 کروڑ ڈالرز پر پہنچ گئیں اور آئی ایم ایف کا گزشتہ مالی سال پاکستان کے آئل امپورٹ کا تخمینہ 15 ارب 28 کروڑ ڈالرز تھا یعنی پاکستان کی سالانہ آئل امپورٹ آئی ایم ایف کےتخمینے سے ایک ارب 58 کروڑ ڈالرز زیادہ رہی۔

دستاویزات کے مطابق پاکستان کی تیل درآمدات میں مالی سال 26-2025 کے دوران سالانہ بنیادوں پر5 اعشاریہ 76فیصد کا اضافہ ہوا۔